Túrkistan oblysynda etnos ókilderi ulttyq ónerdi ulyqtady
Túrkistanda «Úkili dombyra» baıqaýy ótti. «Ulttyq dombyra» kúni men Túrkistan oblysynyń qurylǵanyna 5 jyl tolýyna oraı tuńǵysh ret uıymdastyrylǵan is-sharanyń ótýine oblystyq qoǵamdyq damý basqarmasyna qarasty «Qoǵamdyq kelisim» KMM uıytqy boldy.
Baıqaýda qala, aýdandardan kelgen etnos ókilderi dástúrli ánderdi aıtyp, kúı tartty. Termeni naqyshyna keltirip oryndady. Ulttyq qundylyqtardy ulyqtaǵan sharada óńirlerden kelgen ónerpazdar bar ónerin ortaǵa saldy.
Qorytyndysynda úzdik dep tanylǵan qatysýshylar arnaıy marapatqa ıe boldy.
Túrkistan oblystyq qoǵamdyq damý basqarmasy basshysynyń orynbasary Baqyt Ahymbetov is-sharanyń mán-mańyzyna toqtalyp ótti.
«Ulttyq dombyra» kúni merekesimen barshańyzdy shyn júrekten quttyqtaımyn. Búgingi ótkizilip otyrǵan baıqaý - keshegi Táttimbet, Qurmanǵazy atalar men Dına ájelerimizdiń izin basar ónerpazdardyń tusaýyn kesedi dep senemin», - dedi ol.
«Dástúrli án oryndaý» synynda Muratjan Atajanovtyń baǵy janyp, birinshi oryndy ıelendi. Ekinshi oryndy Dılnoza Tadjımet enshilese, úzdik úshtikti Elına Býkaeva qorytyndylady.
«Kúı oryndaý» saıysynda Alına Mırkamalova birinshi orynǵa laıyq dep tanyldy. Ekinshi oryndy Lıýbov Pechaıkına ıelendi. Al úshinshi oryn Asýman Pashaǵa buıyrdy.
«Terme oryndaý» kezeńinde júldeli oryndardy Muratjan Atajanov pen Alına Mırkamalova jeńip aldy. Sonymen qatar baıqaýǵa qatysqan ózge ónerpazdar men jetekshileri Alǵys hattarmen marapattaldy.
