Túrkistan oblysynda et jáne sút ónimderiniń óndirisi artyp keledi

TÚLKІBAS. QazAqparat – Túrkistan oblysynyń Túlkibas aýdanynda et jáne sút ónimderiniń óndirisi artyp keledi. Aýdanda «Sybaǵa» baǵdarlamasymen iri qara mal basyn kóbeıtýshiler sany kóbeıgen, dep habarlaıdy QazAqparat tilshisi.

Elimizde et sharýashylyǵyn damytýǵa baǵyttalǵan «Sybaǵa» baǵdarlamasy arqyly túlkibastyq sharýalar jeńildetilgen nesıeler alyp, kásibin keńeıtýde. Solardyń biri, Mashat aýylynyń turǵyny, jeke kásipker E.Tólepbekov atalǵan baǵdarlama aıasynda 120 bas analyq jáne 4-bas buqa satyp alǵan. Búginde sharýa mal basyn kóbeıtip, sharýasyn dóńgeletip otyr.

Jalpy, taýly aýdanda jyl basynan beri «Sybaǵa» baǵdarlamasy arqyly 7 sharýa qojalyq memleket tarapynan jeńildetilgen nesıege ıe bolǵan. Oǵan 336 bas sút jáne et baǵytyndaǵy asyl tuqymdy iri qara mal alynyp, qazirgi tańda et ónimderin elimizdiń ár óńirlerine saýdalaýda.

Al, elimizdiń agroónerkásiptik keshenin damytýdyń 2017 – 2021 jyldarǵa arnalǵan memlekettik baǵdarlamasy aıasynda aǵymdaǵy jyly Túlkibas aýdanyna 22 shaǵyn sút fermalaryn ashý mejelengen bolsa, búgingi tańda jospar 127,3 paıyzǵa oryndalyp otyr. BUl kórsetkish 29 birlikti quraǵan. Sharýalardyń aıtýynsha, qazirgi tańda tutynýshylar tarapynan sútke degen suranys óte joǵary. Sebebi, shóbi qunarly Túlkibas aýdanynyń iri qara maldarynyń súti óte maıly bolyp keledi.

Búgingi tańda orta eseppen 5-15 sút baǵytyndaǵy sıyry bar januıalyq sút fermalarynyń ıeleri súttiń lıtrin 70-80 teńgeden «Maılykent-sút», «Fýdmaster» sııaqty sút óndeıtin tsehtarǵa ótkizip, tabys tabýda.