Túrkistan oblysynda «Esim han tóbege» zertteý jumystary júrgiziledi
TÚRKІSTAN. QazAqparat - Túrkistan oblysynyń ákimi Janseıit Túımebaev Tóle bı aýdanyna jasaǵan jumys saparynda Qasqasý aýyldyq okrýgi Keńesaryq eldi mekenindegi «Esim han tóbe» (Dáýittóbe qalashyǵy) tarıhı ornyna keldi. Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy sheńberinde atqarylyp jatqan jumystardy saralaǵan ol «Esim han tóbege» kóńil bólinetinin aıtty.
Bul týraly oblystyq ákimdiktiń baspasóz qyzmeti habarlaıdy.
««Esim han tóbeni» nasıhattap, ǵalymdar men tarıhshylardyń kómegimen zertteý jumystaryn júrgizgen jón. Ol jumystarǵa qoldaý kórsetýge daıynbyz. Óńirimizde tarıhı oryndar kóp. Biraq, sony durys paıdalana almaı otyrmyz. Mysaly, osy jerge kelgen saıahatshylar aýyldyń turǵyndary ázirlegen ulttyq taǵamdardy tutynyp, etnografııasymen tanysýy tıis. Osy arqyly týrızm damıdy. Biz tarıhı oryndardy nasıhattap jańǵyrtý arqyly jas urpaqty otansúıgishtikke tárbıeleımiz», - degen oblys ákimi Janseıit Túımebaev osy mańnan tabylǵan tarıhı jádigerlermen tanysyp, aýyl aqsaqaldarymen pikir almasty.
«Esimhan tóbe» arheologııalyq eskertkish Saıramsý ózeniniń oń jaǵasynda ornalasqan. «Dáýittóbe» qalashyǵyna 2006 jyly Túrkistan oblysy ákimdiginiń «Tarıhı mádenı murany qorǵaý, qalpyna keltirý jáne paıdalaný jónindegi ortalyǵy» MKQK zertteý júrgizgen. Kóne qalashyq týraly derekter Á.H.Marǵulan atyndaǵy Arheologııa ınstıtýtynda saqtaýly. Ǵalymdardyń boljamy boıynsha «Esimhan tóbe» XIV-XVIII ǵǵ. salynǵan.
J.Túımebaev jumys saparynda taý eteginde qazaqtyń bıleri týraly 10 serııaly kórkem fılminiń túsirilim barysyn kórdi. Oblys ákimdiginiń qoldaýymen «Saq» kınostýdııasy qolǵa alǵan bul fılm jastardy otansúıgishtikke tárbıeleıdi. Fılmde Tóle bı jáne ózge de bı-sheshenderimizdiń qaıratkerligi kórsetilmek.
Óńir basshysy «Osyndaı kórikti mekenderde etnoaýyldardy kóbeıtý kerek. Tabıǵaty keremet jerde jurt demalyp qana qoımaı, tarıhymen tanysady. Jaqynda arab tarıhshylarynyń biri jazǵan derekti oqydym. Onda túrik áskerleri óte aıbyndy ári batyr ekeni aıtylady. Biz óz tulǵalarymyzdy, batyrlarymyzdy, bılerimizdi jas urpaqqa dáripteýimiz kerek. Óz tarıhy týraly áserli fılmderdi kórip ósken urpaq ultymen maqtan tutatyn bolady. Túsirilip jatqan fılmde ultymyzydyń ulaǵatty tulǵalary, halqymyzdyń salt-dástúri, batyrlyǵy, sheshendik óneri, jaýyngerligi kórsetiledi. Mine, bul Elbasymyzdyń «rýhanı jańǵyrý» baǵdarlamasymen úılesedi" dep, túsirilim tobynyń jumysyna sáttilik tiledi.
