Túrkistan oblysynda erlikpen qaza tapqan polıtseıdiń qyzy áke jolyn jalǵastyryp keledi

Oblystyq polıtsııa departamenti Esirtki qylmysyna qarsy is-qımyl basqarmasynyń jedel ýákili Aıgúl Rysbaıqyzy er azamattarmen birge ıyq tirese jumys atqarýda, dep habarlaıdy QazAqparat tilshisi.

Polıtsııa kapıtany Rysbaı Qudaıbergenov 1984 jyldyń 9 shildesinde asa qaýipti qylmyskerdi ustaý kezinde qaza tapqan. Artynda jary Darıǵa men tórt qyzy qaldy. Úsh aıdan soń dúnıege Arman atty uly keldi. Al, qyzdarynyń biri Aıgúl áke jolyn jalǵastyrýdy bala kúninen maqsat etken.

Ol Qazaq - Reseı ýnıverstetiniń zań fakýltetin bitirip, ishki ister organdarynda 2005 jyldan beri qyzmet atqaryp keledi. Kentaý qalasynda kámeletke tolmaǵandar isi jónindegi bólimniń, áıelderdi zorlyq-zombylyqtan qorǵaý tobynyń, shtab tobynyń, Shymkent qalasy Ál-Farabı aýdandyq polıtsııa basqarmasynda aǵa ınspektory qyzmetterin abyroımen atqardy. Ol búgingi kúni Túrkistan oblystyq polıtsııa departamentinde qyzmet etip, kóptegen qylmystyń ashylýyna jáne quqyqbuzýshylyqtyń aldyn alýǵa óz úlesin qosyp keledi.

«Polıtsııa qyzmetkeriniń qoǵam aldyndaǵy jaýapkershiligi joǵary. Meniń ákem Rysbaı Qudaıbergenov «Sovet mılıtsııasynyń úzdigi», «Qylmysty izdestirý qyzmetiniń tańdaýly ınspektory» belgilerin keýdesine taqqan tártip saqshysy bolǵan. Ol Kentaý qalalyq ishki ister bóliminde ýchaskelik ınspektor, keıinnen qylmysty izdestirý bólimi bastyǵynyń orynbasary qyzmetterin abyroımen atqarǵan. Qazirgi tańda Kentaý qalasynda ol kisiniń atyna bir kóshe berilip, eskertkish taqta ornatylǵan. El tynyshtyǵy úshin ómirin qıǵan ákemniń ósıetteri maǵan qashanda qymbat. Men ákemdi maqtan tutyp, onyń atyna kir keltirmeýge tyrysamyn»,- deıdi Aıgúl Rysbaıqyzy.