Túrkistan oblysynda erli-zaıypty azamattar blokpostarda úsh aı qyzmet etken
SAIRAM. QazAqparat – Covid-19 pandemııasyna baılanysty elimizde tótenshe jaǵdaı jarııalanǵanda Túrkistan oblysynda turatyn erli-zaıypty blokposttarda kúni-túni qyzmet etti.
Saıram aýdanynda ýchaskelik polıtsııa ınspektory bolyp qyzmet atqaratyn Rysdáýlet Súıeýbekov jary Jansaıa Eralhan ekeýi pandemııaǵa qarsy is-sharalarǵa belsendi atsalysty, dep habarlaıdy QazAqparat tilshisi.
Karantın engizilgennen bastap polıtsııa qyzmetkerleri men medıtsına mamandary birlesip, saqtyq sharalaryn qolǵa alǵanda árbir aýylǵa, eldimekenge blokpostar qoıylǵany belgili. Onda polıtsııa men medıtsına qyzmetkerleri kúsheıtilgen rejımde jumys istedi. Osyndaı azamattardyń qatarynda Saıram APB qyzmetkeri Rysdáýlet Súıeýbekov pen emhanada medbıke bolyp eńbek etetin Jansaıa Eralhan da bir kisideı kezekshilikte boldy. Ýchaskelik ınspektor Saıram aýdanyna kireberistegi jaǵdaıdy qadaǵalasa, Jansaıa Shymkenttegi bekette turǵyndardy tekserip turǵan. Al, úıdegi bala-shaǵasyn ájelerine amanattapty. Jas otbasy osylaısha úsh aı boıy otbasynan jyraqta júrip, ózderine júktelgen jumysty abyroımen atqaryp shyqty.
«Qaýip qatermen betpe-bet kelip, pandemııaǵa qarsy is-sharalarǵa atsalystyq. Jalpy qaýipti aýrýmen kúreste barlyǵymyz antqa adaldyq tanyttyq. «Biz birgemiz» urany bárimizdi jigerlendire tústi. Qandaı jaǵdaı bolmasyn, árqashan elimizdiń turaqtylyǵy men azamattarymyzdyń beıbit ómiri úshin júktelgen mindetterdi oryndaýǵa ázirmiz. Qaýipsizdik sharalaryn ózimiz de qatań ustandyq. Qolǵaptar men betperdeni, kıimderimizdi ýaqtyly aýystyryp, zalalsyzdandyrý jumystaryn ýaqytyly atqardyq. Kózge kórinbeıtin vırýspen kúres, árıne ońaı bolǵan joq», – deıdi polıtsııa aǵa leıtenanty.
Búginde ýchaskelik polıtsııa ınspektory ózine bekitilgen aımaqta qalypty jumysqa kirisken. Al, jary Jansaıa bolsa Shymkenttegi jumysyna baryp kelip júr.
