Túrkistan oblysynda erikti jastar úılerdi aralap júr

KENTAÝ. QazAqparat – Túrkistan oblysy, Kentaý qalasynda erikti jastar úgit-nasıhat jumystaryna atsalysty. Jastar TJD qyzmetkerlerimen birge turǵyndardy túrli tótenshe jaǵdaılardan saq bolýǵa shaqyrdy, dep habarlaıdy QazAqparat tilshisi.

Atalǵan shara qalalyq jastar resýrstyq ortalyǵy men «Jas Otan» erikti jastardyń qatysýymen jáne Kentaý qalasynyń Tótenshe jaǵdaılar bólimi qyzmetkerleriniń uıymdastyrýymen ótti. Jastar sala mamandarymen birlesip, qala, aýyl turǵyndaryna «Tótenshe jaǵdaılar kezinde is-qımyldar» men «Ýly gazdan saqtanyńyz!» atty jalynamalar taratty.

Sondaı-aq, turmystyq órt qaýipsizdigi erejeleri men jylý maýsymynda oryn alatyn órtter týraly aqparattardy úlestirdi. Qoǵamda oryn alyp jatqan túrli tótenshe jaǵdaılar men olardyń aldyn alý sharalary, adamdar jappaı jınalatyn oryndarda órt qaýipsizdigi talaptaryn qatań saqtaý kerektigi taqyryptarynda túsindirme jumystaryn júrgizip, eskertýler taratty.