Túrkistan oblysynda er adam áıelin jas balalarynyń kózinshe óltirgen

TÚRKІSTAN. QazAqparat - Túrkistan oblysynda kúdikti er adam áıelin kámeletke tolmaǵan balalarynyń kózinshe óltirgen. Qazir balalarǵa psıhologııalyq kómek kórsetilýde, dep habarlaıdy QazAqparat tilshisi.

Oblystyq PD baspasóz qyzmetiniń málimetinshe, qylmystyq oqıǵa 29 sáýir kúni túngi saǵat 02:45 shamasynda bolǵan. Oqıǵa ornyna jetken polıtseıler otbasylyq janjal kezinde áıel adam kúıeýiniń salǵan dene jaraqattarynan qaıtys bolǵanyn anyqtaǵan.

«Atalǵan jaıt Ordabasy aýdandyq PB-de QR QK 99-baby 1-bóligi «Kisi óltirý» boıynsha tirkeldi. Alynǵan zattaı dáleldemeler saraptamaǵa joldandy. Kúdikti óziniń áreketin moıyndap, ókinishin bildirýde. Qazirgi tańda sotqa deıingi tergep-tekserý amaldary júrgizilýde. Tergeý barysynda bolǵan oqıǵanyń barlyq mán-jaıy anyqtalatyn bolady. Kúdikti er azamat qamaýǵa alynǵan» delingen habarlamada.

Sonymen qatar, kúdikti dep tanylǵan Ordabasy aýdanynyń turǵyny polıtsııa bóliminde eshqandaı profılaktıkalyq esepte turmaǵany belgili boldy. Osy kúnge deıin kórshilerden nemese týystarynan qandaı da bir otbasylyq janjal týraly eshqandaı aryz-shaǵym túspegen. Ákimdik qyzmetkerleri men polıtsııa bóliminiń basshylyǵy jábirlenýshiniń týystarymen kezdesip, túsindirý jumystaryn júrgizgen. Erli-zaıyptylardyń ata-analary kámeletke tolmaǵan tórt balany óz qamqorlyqtaryna alatynyn aıtyp otyr. Polıtsııa men ákimdik tarapynan otbasyna barlyq qajetti kómek kórsetý sharalary qatań baqylaýǵa alyndy.