Túrkistan oblysynda elimizdiń bilikti genetıkteri bas qosty
TÚRKІSTAN.QazAqparat - Túrkistan oblystyq klınıkalyq aýrýhanasynda «Dárigerdiń klınıkalyq praktıkasyna genetıkalyq dıagnostıkanyń zamanaýı ádisterin engizý» taqyrybynda ǵylymı-praktıkalyq semınar ótti. Aýqymdy sharaǵa QR DSM shtattan tys genetıgi, medıtsına ǵylymdarynyń doktory, professor Gúlnar Svıatova men jergilikti mamandar qatysty, dep habarlaıdy QazAqparat tilshisi.
Aýqymdy shara oblystyq densaýlyq saqtaý basqarmasynyń basshysy Muqan Egizbaev pen klınıkalyq aýrýhananyń bas dárigeri Marat Pashımovtyń, sondaı-aq óńirdiń bas nevrology Nazıra Asanovanyń uıymdastyrýymen ótti. Semınarǵa qatysqan sala mamandarynyń aıtýynsha, búginde kóptegen tuqym qýalaıtyn jáne basqa da qaýipti keseldi erte anyqtaıtyn jáne aldyn alatyn amaldar tabylǵan. Álem boıynsha alǵash ret elimizge ákelingen jańa tandemdi mass-spektrometrııa modeliniń kómegimen náresteniń 1 tamshy qanynan 49 túrli genetıkalyq aýytqýdyń bar-joǵyn bilýge bolady. Bul apparat ázirge ınvestorlardyń qarjysyna jekemenshik emhanaǵa ákelingen.
«Aldaǵy ýaqytta memlekettik-jekemenshik áriptestik aıasynda jappaı qoldanysqa engizýge múmkindik bar. Jańa tehnologııanyń arqasynda zat almasý buzylýynan bolatyn aýytqýlar - mýkovıstsıdoz, fenılketonýrııa, atsıdoz aýrýlaryn anyqtaýǵa bolady. Kesel sábı kezinde anyqtalyp, tıisti emin qabyldasa, aýrýdan aıyǵýǵa ábden bolady. Mundaı múmkindikke Túrkistan oblysynyń búldirshinderi de alǵash ret qol jetkizdi. Osylaısha ana men bala ólimin, múgedektikti tómendetip, krıptogendi ınsýltterdiń sebepterin anyqtaý múmkin bolmaq»,- deıdi Almaty qalasyndaǵy molekýlıarlyq medıtsına ortalyǵynyń ókilderi.
Jıynda hromosomalyq jáne tuqym qýalaıtyn aýrýlardy perınataldyq dıagnostıkalaýdyń qazirgi zamanǵy genetıkalyq ádisteri men neırobulshyqet aýrýlardyń molekýlalyq - genetıkalyq dıagnostıkalaý, sondaı-aq eklampsııaǵa jáne júkti jáne bosanǵannan keıingi áıelderdiń ınsýltine beıimdiligine skrınıng júrgizý máseleleri jaıly aıtyldy. Túrkistan oblysynyń nevrologtary men neonatologtary, pedıatrlar men akýsher - gınekologtar, ýltradybystyq prenataldyq dıagnostıka dárigerleri men psıhıatrlar aýqymdy semınar aıasynda kúrdeli klınıkalyq jaǵdaılardy taldady.
