Túrkistan oblysynda elimizdegi eń úlken jylyjaı kesheniniń irgetasy qalandy
Keles aýdanynda elimizdegi eń úlken jylyjaı kesheniniń kapsýlasyn qoıý rásimi ótti. 500 gektar aýmaqta ornalasatyn ónerkásiptik jylyjaılar jobasy «EKO-kýltýra» kompanııasynyń qoldaýymen júzege asyp otyr.
Munda negizinen qyzanaq pen qııar ósirilmek. Zamanaýı jylyjaı kesheni jylytý júıesi men salqyndatýdy, jaryq rejımin, tamshylatyp sýarýdy, atmosferadaǵy kómirqyshqyl gazynyń mólsherin basqaratyn zamanaýı avtomattandyrylǵan klımattyq baqylaý júıesimen jabdyqtalady.
Saltanatty jıynǵa Túrkistan oblysynyń ákimi Darhan Satybaldy,«Qazaqstan Damý Banki» AQ Basqarma tóraǵasy Nurlan Baıbazarov, «KazakhInvest» AQ-nyń Basqarma tóraǵasy Meıirjan ıÝsýpov, «EKO-kýltýra» agrónerkásiptik holdıngi dırektorlar keńesiniń tóraǵasy Aleksandr Rýdakov qatysty. Óńir úshin bul jobanyń asa mańyzdy ekenin aıtqan oblys ákimi óńirde agroónerkásip klasteri damıtynyn jetkizdi.
«Túrkistan – respýblıka halqyn jemis-jıdekpen jáne kókónis ónimderimen qamtamasyz etetin negizgi óńir. Oblysta 1569 gektar alqapta 3366 birlik jylyjaı bar. Bul respýblıkadaǵy jylyjaılardyń 71 paıyzy quraıdy. Onda 12 myńnan astam adam eńbek etýde. 2015 jylmen salystyrǵanda atalǵan salaǵa tartylǵan ınvestıtsııa kólemi 7 esege ulǵaıdy, – dedi Darhan Satybaldy.
Reseılik «EKO-kýltýra» agrónerkásiptik holdıngi dırektorlar keńesiniń tóraǵasy Aleksandr Rýdakov bul joba agrosalany damytýǵa úlken serpin beretinin atap ótti.
Keles aýdany, Birlik aýylynda júzege asatyn jobanyń birinshi kezeńiniń qurylysy 2024 jyldyń tamyz aıynda aıaqtalady dep josparlanyp otyr. Al búkil joba 2027 jyly tolyqtaı júzege aspaq.
