Túrkistan oblysynda elimizdegi eń iri mal bordaqylaý kesheni salyndy
Qaınarbulaq aýyl okrýgindegi nysannyń jalpy aýmaǵy 76 gektardy qamtıdy. Jeke kásipker Beksultan Begalıev júze asyryp otyrǵan jobanyń quny 3 mlrd teńgeni quraıdy. Ekinshi deńgeıdegi bankter men AQQ korporatsııasy arqyly nesıe alǵan kásipker táýligine 500 tonna et óndirýdi kózdeıdi. Asyltuqymdy mal basyn bordaqylaıtyn keshende 25 jergilikti turǵyn turaqty jumyspen qamtylmaq. Sapar barysynda oblys ákimi Saıram aýdany aýmaǵynda zańsyz jer qoınaýyn joıý boıynsha qurylǵan mobıldi toptyń atqarǵan jumystarymen tanysty. Zańsyz jer qoınaýyn paıdalaný faktilerin anyqtaý jáne olarǵa zertteý jumystaryn júrgizý maqsatynda Ómirzaq Shókeevtiń tapsyrmasymen jumysshy jáne mobıldi top quramdary qurylyp, jappaı tekserý bastalǵany belgili. Oblys basshysy bul baǵyttaǵy jumystardyń ári qaraı jalǵasatynyn aıtyp, jaýapty tulǵalarǵa naqty tapsyrmalar júktedi. Aýdan aýmaǵynda 23 keń taralǵan paıdaly qazbalardy óndiretin oryndar ruqsat qujattary alynǵany anyqtalǵan. Jer ýchaskelerin nysanaly maqsatyna saı paıdalanbaı, zańsyz jer ýchaskelerin qazyp, qıyrshyq tas óńdep, qurylys jumystaryn júrgizip otyrǵan 31 jeke jáne zańdy tulǵalar nemese 34 jer telimi anyqtalǵan. Onyń ishinde 15 zańsyz jer qoınaýyn paıdalanýshylarǵa shara kórilip, sotta qaralýda. 19 zańsyz jer qoınaýyn paıdalanýshylar boıynsha Túrkistan oblystyq polıtsııa departamenti tarapynan tergep, tekserý júrgizilýde.Sonymen qatar qurylǵan jumysshy jáne mobıldi top, oblystyq avtokólik ınspektsııasymen birlese 56 qum tas tasymaldaýshy avtokólikterge 2 603 640 teńge aıyppul salǵan. Sondaı-aq, aımaqta sonda alǵashqy eresekter men balalarǵa arnalǵan jaıalyqtar shyǵaratyn zaýyt óz jumysyn bastady. Túrik kompanııasy «Royal Hijyen ve Sağlık Ürünleri San. Tic. A.Ş.» (Roıal Hıdjıen) jáne Túrkistan oblysynyń múgedekter qoǵamy «CaPable Group» birlesip, Saıram aýdanynda óndiristik qýaty jylyna 100 mln dana bolatyn jórgekterdi óndirý jobasyn iske asyrýdy bastady. Óndiris ornynda 60 jańa jumys orny ashyldy. Bul jobanyń quny 3 mlrd teńgeni quraıdy. Aıta ketý kerek, bul óndiris eń aldymen oblystyń barlyq múgedekterin jaıalyqtarmen qamtamasyz etedi. Al, qalǵan bóligi basqa óńirlerge ketedi. Tolyq qýatqa shyqqannan keıin ınvestorlar óz ónimderin EAEO jáne TMD elderine eksporttaýdy josparlap otyr. Bul óz kezeginde otandyq eksporttyń damýyna qosymsha serpin beredi. Jobany iske asyrý barysynda ınvestorlar QR SІM Investıtsııalar komıtetimen jasalǵan ınvestıtsııalyq kelisimshart sheńberinde memlekettik preferentsııalarǵa ıe bolǵan.
