Túrkistan oblysynda elektr energııasy tapshy
Bul týraly Túrkistan óńirlik kommýnıkatsııa qyzmetinde ótken brıfıngte Túrkistan oblysynyń energetıka jáne turǵyn-úı kommýnaldyq sharýashylyq basqarmasy basshysynyń orynbasary Roza Sarıeva málimdedi.
«Túrkistan oblysy elektr energııasy tapshy óńir sanalady. Búginde oblystyń elektr qýatyna qajettiligi - ortasha 320 MVt/saǵat, onyń 20% ishki energetıka kózderinen alynady. Al, qalǵan 80% elimizdiń soltústik óńirinen jáne Shymkent, Taraz qalalaryndaǵy stansalardan tasymaldanady», - dedi ol.
Spıkerdiń sózinshe, óńirde 831 eldimekenniń 815-i ortalyqtandyrylǵan elektr jelisine qosylǵan.
Qalǵan 16 eldimeken derbes elektr qondyrǵydan elektr qýatyn paıdalanyp otyr.
Al, 254 eldi mekendegi 341 myń turǵyn sapasyz elektr energııasyn tutynyp otyr.
«Túrkistan oblysy boıynsha sapaly elektr qýatymen qamtamasyz etýdiń 2023-2025 jyldarǵa arnalǵan is shara josparyna sáıkes kezeń-kezeńimen jumys atqarylyp jatyr. Bıyl óńirde 42 nysannyń qurylysyna bıýdjetten 13,6 mlrd teńge bólinip, 11 nysandy paıdalanýǵa berý kózdelgen. Al, qalǵan 31 nysannyń qurylysy 2023 jylǵa ótpeli. Keler jyly 35 nysannyń qurylysyna 8,1 mlrd teńge bólindi. Bul da biraz máseleni sheshedi degen oıdamyz. 2025 jyldyń qorytyndysymen oblystaǵy 254 eldimekendegi 341 myń turǵyndy sapaly, turaqty elektr qýatymen qamtamasyz etý josparda bar», - deıdi Roza Sarıeva.
