Túrkistan oblysynda eksporttaýshylardy qoldaý máselesi qalaı sheshilip jatyr
TÚRKІSTAN. QazAqparat - Túrkistan oblysynda alǵashqy óńirlik eksporttaýshylar keńesi ótti. Jıynda oblys ákimdigi tarapynan ınvestıtsııalar tartý jáne eksportty damytý máseleleri talqylandy, dep habarlaıdy QazAqparat tilshisi.
Jıynǵa Túrkistan oblysy ákiminiń orynbasary Meıirjan Myrzalıev pen «QazTrade» Saýda saıasatyn damytý ortalyǵy» AQ Bas dırektory Azamat Asqaruly, «Atameken» UKP jáne ákimdiktiń tıisti basqarma basshylary jáne Túrkistan oblysynyń 62 iri eksporttaýshysy qatysty.
Basqosýda eksporttaýshylardy qoldaý boıynsha memlekettik sharalardy keńeıtý jáne olardy bir terezege shoǵyrlandyrý máselesi sóz boldy.
Sondaı-aq, óńdelgen otandyq taýarlardy jyljytýǵa jumsalǵan shyǵyndardyń bir bóligin óteý máselesi ortaǵa salyndy.
Jıyn barysynda oblys ákiminiń orynbasary Meıirjan Myrzalıev óńirdegi eksporttyń qazirgi jaǵdaıy men óńirdiń eksporttyq áleýeti týraly aıtyp berdi.
Onyń sózinshe, oblysta eksportqa baǵyttalǵan 224 kásiporyn tizimi jasaqtalǵan.
Onyń ishinde mashına jasaý, metallýrgııa, tamaq, jeńil, farmatsevtıka jáne aǵash óńdeý salalarynda jumys isteıtin 60-tan astam belsendi eksporttaýshy kompanııa jumys isteıdi.
«Ótken jyly eksportqa baǵdarlanǵan jańa kásiporyndar esebinen biz eksporttyń jalpy kólemindegi óńdelgen taýarlardyń joǵary úlesin saqtap qaldyq – qazir ol shamamen 50% quraıdy», - dedi Meıirjan Myrzalıev.
Ákim orynbasary eksporttaýshylardy qoldaýdyń memlekettik sharalaryn keńeıtý jáne olardy bir terezege shoǵyrlandyrý óńir óndirýshilerine eleýli qoldaý kórsetetinine senim bildirdi.
Bul eksporttyq jelini keńeıtip, syrtqy naryqtaǵy otandyq ónim kólemin arttyratynyn basa aıtty.
