Túrkistan oblysynda ekologııalyq zańnamany buzǵandarǵa 13 mln teńge aıyppul salyndy
TÚRKІSTAN. QazAqparat - Túrkistan oblysynda ekologııalyq ahýal qatań qadaǵalanyp otyr, dep habarlaıdy QazAqparat óńirlik kommýnıkatsııalar qyzmetine silteme jasap.
QR Ekologııalyq kodeksiniń talaptaryn oryndaý maqsatynda ótken jyly Túrkistan oblysynda jalpy 147 tekserý júrgizildi. Onyń ishinde jospardan tys – 109 tekserý, profılaktıkalyq baqylaý jáne qadaǵalaýdy júrgizý tizimine sáıkes – 37 tekserý júrgizildi.
Jalpy Túrkistan oblysy boıynsha ekologııalyq ahýal jiti qadaǵalanyp otyr. Bul týraly óńirlik kommýnıkatsııalar qyzmetinde ótken brıfıngte oblystyq ekologııa departamentiniń basshysy Imangeldi Túımebaev málimdedi.
Tekserý nátıjesinde 478 ekologııalyq zańbuzýshylyq anyqtalyp, olardy joıý úshin 397 nusqama berilgen. Sondaı-aq, 255 jeke, laýazymdy jáne zańdy tulǵalarǵa 13 554 194 teńge ákimshilik aıyppul salynyp, onyń 185-i óz erkimen 10 372 695 teńge tólem jasaǵan.
«Departamentke oblys aýmaǵyndaǵy jeke jáne zańdy tulǵalardan 99 aryz-shaǵym túsken, onyń 97-si qaralyp, aryz ıelerine tolyq jaýap berildi. Al qalǵan ekeýi qaralyp jatyr. Sonymen qatar, Túrkistan oblysy boıynsha ekologııa departamenti «KentaýServıs» MKK jáne Túrkistan qalasynda ornalasqan «Jylý» MKK-men jylytý qazandyqqa jaǵatyn qatty otyndy (kómir) tabıǵı gazǵa kóshirý, sondaı-aq ozyq tehnologııalardy engizý boıynsha qorshaǵan ortaǵa emıssııalardyń kólemin azaıtý maqsatynda memorandým jasady», - dedi Imangeldi Qanseıituly.
Budan ózge, oblys aýmaǵynda 192 kelisimshart negizinde 157 jer qoınaýyn paıdalanýshy jumys júrgizedi. Qorshaǵan ortaǵa keltirilgen zalal úshin 122 tabıǵat paıdalanýshyǵa 73 736 331 teńge nusqama joldanyp, onyń 23%-y óz erkimen memlekettik bıýdjetke tólem jasaǵan.
