Túrkistan oblysynda ekologııaǵa baılanysty 32 qylmys tirkeldi

NUR-SULTAN. QazAqparat – Bıylǵy 8 aıda Túrkistan oblysynyń aýmaǵynda qorshaǵan ortaǵa baılanysty 32 qylmys tirkeldi, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.

«Oblys aýmaǵynda zańsyz balyq aýlaýǵa, jer qoınaýyn óz betinshe paıdalanýǵa, ósimdikter men janýarlardyń sırek kezdesetin túrlerin zańsyz paıdalanýǵa baılanysty 32 ekologııalyq qylmysty anyqtady. Onyń ishinde 18 qylmys «Balyq resýrstaryn jáne basqa da sý janýarlary men ósimdikterin zańsyz aýlaý» boıynsha tirkelgen. Sondaı-aq, 14 is sotqa joldanǵan», - delingen baspasóz málimdemesinde.

Sonymen qatar, polıtsııa qyzmetkerleri jyl basynan beri balyq aýlaý erejelerin buzǵan 360-tan astam adamdy jaýapkershilikke tartty.

«Onyń ishinde 335 quqyq buzýshyǵa QR ÁQBtK 383-babynyń 1-tarmaǵy boıynsha ákimshilik hattama toltyryp, 5,5 mıllıon teńgege jýyq aıyppul salyndy. Sondaı-aq, qoldanýǵa zańmen tyıym salynǵan quraldardyń kómegimen balyq aýlaǵan 26 adamǵa qatysty jınalǵan materıaldar QR ÁQBtK 383-babynyń 3-tarmaǵy boıynsha zańdy sheshim qabyldaý úshin sotqa joldandy», - dep málimdeıdi PD baspasóz qyzmeti.

Brakonerlerden 3 tonnaǵa jýyq zańsyz aýlanǵan balyq, 33 qaıyq, 4 qaıyq motory men 44 túrli zańsyz balyq aýlaý quraldary tárkilengen.