Túrkistan oblysynda ekinshi jyl qatarynan 12 úshem ómirge keldi
Oblysta ótken jyly 605 egiz, 12 úshem týdy. Úshemder sany ekinshi jyl qatarynan qaıtalanyp otyr. Aıta ketsek, 2021 jyly oblysta 64 myńǵa jýyq bala dúnıege kelgen edi. Olardyń arasynda 631 egiz, 12 úshem boldy.
Bıyl oblysta ІІІ deńgeıli bosandyrý qyzmetin uıymdastyrý maqsatynda Ordabasy aýdany Temirlan aýylynda 200 tósek-orynǵa arnalǵan perınataldyq ortalyq qurylysy júrgizilmek.
Jergilikti bıýdjet esebinen Saryaǵash, Otyrar, Qazyǵurt aýdandarynda dárigerlik ambýlatorııa salynady.
«Deni saý ult: árbir azamat úshin sapaly jáne qoljetimdi densaýlyq saqtaý» ulttyq jobasy aıasynda Túrkistan oblysyndaǵy Maqtaaral, Keles, Saryaǵash, Saıram, Tólebı, Qazyǵurt aýdandarynda 11 medıtsınalyq tirek qurylysy aıaqtalyp, paıdalanýǵa berildi.
Sonymen qatar, memlekettik-jekemenshik áriptestik boıynsha 4-feldsherlik-akýsherlik pýnktiniń qurylysy júrgizilip jatyr. Ǵımarattardy sanıtarlyq talaptarǵa sáıkestendirý maqsatynda basqarmaǵa qarasty 5 aýrýhanada kúrdeli jóndeý jumystary bastaldy.
Jedel járdem qyzmetin normatıvke sáıkestendirip, júktemesin azaıtý maqsatynda Túrkistan qalasynda demeýshiler esebinen 25 brıgadaǵa arnalǵan stantsııa salyndy. Sondaı-aq, Shardara aýdanynda bir aýysymda 150 adam qabyldaıtyn qalalyq emhana qurylysy aıaqtaldy.
Aıta ketsek, Jańa jyl qarsańynda elde 240 sábı dúnıege keldi, onyń ishinde bir jup egiz bar.