Túrkistan oblysynda ekinshi ret mas kúıde kólik júrgizgen turǵyn ustaldy
TÚRKІSTAN. QazAqparat - Túrkistan oblysynda polıtsııa ekinshi ret mas kúıde kólik júrgizip, jol-kólik oqıǵasyn jasaǵan kúdiktini qamaýǵa aldy, dep habarlaıdy QazAqparat oblystyq PD baspasóz qyzmetine silteme jasap.
Ordabasy aýdandyq polıtsııa bólimine tańǵy saǵat 08:30 shamasynda jergilikti turǵyn óziniń basqarýyndaǵy «Mersedes Bents-80» markaly avtokóligine mas kúıde otyryp, «Mersedes Bents-190» markaly kólikti soqqany habarlanǵan.
Medıtsınalyq saraptama júrgizýshiniń mas ekenin anyqtady. Sondaı-aq onyń buǵan deıin mas kúıde kólik júrgizgeni úshin 5 jylǵa kólik basqarý quqyǵynan aıyrylǵany belgili boldy.
Osy oqıǵaǵa qatysty Qylmystyq kodekstiń 346-baby «Kólik quraldaryn basqarý quqyǵynan aıyrylǵan jáne alkogoldik, esirtkilik jáne (nemese) ýytqumarlyq masań kúıdegi adamnyń kólik quralyn basqarýy» boıynsha kúdikti qamaýǵa alynyp, tergeý amaly júrgizilip jatyr.
Túrkistan oblysynyń polıtseıleri júrgizýshiler men jaıaý júrginshilerdi jol qozǵalysy erejelerin qatań saqtaýǵa shaqyrady.
