Túrkistan oblysynda ekige bólinip ketken aýyldy biriktirý máselesi kóterildi

TÚRKІSTAN. QazAqparat – Parlament Májilisiniń depýtaty Ulasbek Sádibekov Kentaý qalasyna jumys saparymen bardy, dep habarlaıdy QazAqparat tilshisi.

Túrkistan oblysynda Qusshy ata degen aýyl bar. Búginde bir joldyń boıynda ornalasqan aýyl ekige bólinip ketken. ıAǵnı joldyń bir beti Kentaý qalasyna qarasa, ekinshi jaǵy Saýran aýdanyna tıeseli. Sondyqtan Saýran jaǵyndaǵy aýyldyń muǵalimi jalaqysyna qosymsha ekologııalyq ústemeaqy alady. Al Kentaýǵa qaraıtyn mekteptiń muǵalimderine mundaı múmkindik berilmegen. Al báriniń jutyp otyrǵany – bir aýa.

Májilis depýtaty Ulasbek Sádibekovtyń kentaýlyqtarmen kezdesýine arnaıy kelgen Qusshy ata aýylynyń turǵyndary atalǵan máseleni sóz etip, ekige bólingen aýyldy biriktirip berýin surady.

«Bizdiń aýylda ózekti máseleler kóp. Al ony sheshý úshin joldyń eki betindegi aýyldy biriktirip, Kentaý qalasyna qosý kerek. Bul iske halyqta qarsy emes. Júrgizilgen saýalnamada jergilikti turǵyndardyń 90 paıyzy kelisimin berip otyr» - dedi qoǵamdyq qabyldaýǵa kelgen aýyl turǵyny Máýlen Musahanov.

Sondaı-aq halyq qalaýlysy ótkizgen qabyldaýda qala turǵyny Qyztýmas Aldashúkirova Y.Altynsarın kóshesi №11 úıdiń apatty jaǵdaıda turǵanyn sóz etti. Jaryqtarynyń jıi óshetinin, sý men káriz júıesiniń eskirgenin, tipti kireberistegi kirpishteri quzdanyp qulaýǵa aınalǵanyn jetkizdi. Atalǵan máselege oraı respýblıkalyq bıýdjetten qarjy bólinip, jóndeý jumystaryn júrgizilse degen usynysyn aıtty.

Al Kentaýdyń qurmetti azamaty Mırash Áshirova M.Áýezov atyndaǵy №22 mekteptiń máselesin kóterdi. Búginde atalǵan mektepte oqýshy syıymdylyǵy jetpeı jatyr. Sondyqtan bilim ordasynyń qasyna qosymsha ǵımarat salynýy qajet. Oǵan mekteptiń aýlasynda jer jetkilikti.

Qoǵamdyq qabyldaýda aqyly qoǵamdyq jumys atqaratyn jumysshylar jalaqysynyń azdyǵy aıtyldy. Al jasyl el jasaqtarynyń atynan kelgen jastar eńbek jasaǵyna qosymsha qarjy bólinip, jumysshy jastardyń sanyn kóbeıtý kerektigin sóz etti.

Máselelermen muqııat tanysqan Ulasbek Sádibekov barlyq máseleni arnaıy jazyp aldy. Aldaǵy ýaqytta aıtylǵan jaǵdaılardy tereń zerttep, oń sheshilýine atsalysatynyn jetkizdi.

Munan soń, halyq qalaýlysy qaladaǵy №5 JEO jumysymen tanysty. Budan bólek, jóndeýden ótip jatqan turǵyn úılerdi kórdi. Sondaı-aq qoǵamdyq qabyldaýda turǵyndar aıtqan Y.Altynsarın kóshesindegi №11 úıde bolyp, turǵyndarmen kezdesti.

Halyq qalaýlysy sala mamandaryna atalǵan jaǵdaıdy nazarǵa alý kerektigin tapsyrdy. Al týyndaǵan máselelerdi Parlament qabyrǵasynda kóterip, tıisti mınıstrlikterge jetkizetinin aıtty.