Túrkistan oblysynda eki jasóspirim tokqa túsip, qaıtys boldy
TÚRKІSTAN. QazAqparat - Túrkistan oblysynda eki jasóspirim tokqa túsip, qaıtys boldy. Oblystyq TJD málimetinshe, baqılyq bolǵandardyń biri 12 jastaǵy jetkinshek bolsa, ekinshisi 15 jastaǵy qyz bala, dep habarlaıdy QazAqparat tilshisi.
«2018 jylǵy 1 shildede, saǵat 20.00-de shuǵyl kezekshilerdiń basqarý pýltine Maqtaaral aýdany Atakent aýyly Pýshkın kóshesiniń boıyndaǵy jekemenshik úılerdiń birinde 2006 jyly týǵan jasóspirimdi elektr togy soqqany týraly málimet kelip tústi, bala oqıǵa ornynda qaıtys bolǵan» delingen TJD baspasóz qyzmetiniń habarlamasynda.
Al, ekinshi jaǵdaı osy kúni saǵat 22.00-de Túrkistan qalasyna qarasty Otyrar shaǵyn aýdanynda oryn alǵan. Toǵyz qabatty úıde turatyn qyz bala elektr sháınekti qosqanda ony tok soqqan. Saldarynan 2003 jyly týǵan qyz oqıǵa ornynda jan tapsyrdy.
Aıta keteıik, jyl basynan beri elektr quraldardy paıdalaný kezinde qaýipsizdik tehnıkasy erejelerin saqtamaǵan 2 oqıǵa oryn alǵan.
