Túrkistan oblysynda eki ret alaıaqtyq jasaǵan turǵyn Nur-Sultan qalasynda qolǵa tústi
TÚRKІSTAN. QazAqparat - Túrkistan oblysy, Ordabasy aýdanynyń turǵyny aýyldastaryn aldap, ártúrli syltaýmen aqshalaryn aldap alyp ketken. Jábirlenýshilerdiń aıtýyna qaraǵanda kúdikti olarǵa 1 mıllıonǵa jýyq shyǵyn keltirgen, dep habarlaıdy QazAqparat tilshisi.
Túrkistan oblystyq PD baspasóz qyzmetiniń málimetinshe, sezikti aǵymdaǵy jyldyń basynda tanysynyń birine tıimdi baǵamen jylqy alyp beremin dep 600 myń teńgesin alǵan. Keıinnen oǵan ne malyn, ne teńgesin qaıtarmaı qoıǵan. Birshama kúnnen soń ekinshi bir jábirlenýshiden tap osy kúdikti tulǵaǵa baılanysty aryz kelip túsedi. Onda aryzdanýshy álgi kúdikti azamatqa memleketten qomaqty qarjy alyp beremin dep ýáde bergennen soń, 400 000 teńgege jýyq qarjysyn tapsyrǵandyǵyn kórsetken. Alaıda osy kúnge deıin aqshamen birge álgi azamattyń joǵalyp ketkenin, ózdiginen izdestirip taba almaı jatqandyǵyn aıtqan.
Polıtseıler jábirlenýshilerdiń aryzdary boıynsha QR Qylmystyq kodeksiniń 190-baby «Alaıaqtyqpen» is qozǵap, kúdiktini izdestirgen. Onyń meken-jaıyn anyqtap tapqanymen úıinde bolmaı shyqty. Jaqyndaryna aıtpastan, izim-ǵaıym joǵalǵany belgili bolǵan. Aýdannyń Krımınaldy polıtsııa bólimshesiniń qyzmetkerleri qylmyskerdi izdestirýdi jalǵastyryp, kúdiktiniń fotosýretin kórsetý boıynsha keshendi is-sharalardy qolǵa aldy. Aqyry ol «Nelegal» is-sharasy aıasynda Nur-Sultan qalasynda jaldamaly páterlerdiń birinde qolǵa tústi.
1974 jyly týǵan er azamat búgingi tańda ýaqytsha qamaýǵa alyndy.
Polıtseıler kúdiktiniń taǵy da basqa qylmystarǵa qatysy bar-joqtyǵyn tekserýde. Sonymen qatar tájirıbeli tergeýshilerden quralǵan top tergep-tekserý amaldaryn júrgizýde.
