Túrkistan oblysynda eki mln halyqqa 30 medıtsınalyq mekeme qyzmet kórsetedi
TÚRKІSTAN. QazAqparat - Búginde Túrkistan oblysynda turatyn 2 mıllıonǵa jýyq halyqqa 30 aýrýhanalyq uıym, sanatorııler men jedel medıtsınalyq kómek stantsııasy qyzmet kórsetedi. Bul týraly Óńirlik kommýnıkatsııalar qyzmetinde ótken baspasóz máslıhatynda oblystyq Densaýlyq saqtaý basqarmasynyń basshysy Muqan Egizbaev málim etti, dep habarlaıdy QazAqparat.
Oblys ákimdiginiń aqparatyna sáıkes, óńirde bastapqy medıtsınalyq-sanıtarlyq kómek kórsetetin medıtsınalyq ýchaskelerdiń jalpy sany - 1119, onyń 783-i jalpy praktıka dárigerleriniń ýchaskeleri, 127 - terapevtik, 209 - pedıatrııalyq.
Basqarma basshysynyń aıtýynsha, oblystaǵy medıtsına salasy ózge óńirlermen salystyrmaly túrde alǵanda birshama ilgeri damyp keledi.
«2018 jyly Kentaý, Saıram, Saryaǵash aýdandarynda 3 ınsýlttik ortalyq ashylyp, oblystyq bıýdjet esebinen 1 mlrd teńgege 3 kompıýterlik tomograf satyp alyndy. Klınıkalyq-dıagnostıkalyq zerthana qyzmetteriniń sapasyn jaqsartý, qural-jabdyqty jáne medıtsınalyq maqsattaǵy buıymdardy, kadrlyq áleýetti utymdy paıdalaný úshin Leńgir jáne Kentaý qalalarynda emhanalar men aýrýhanalardyń zerthanalary ortalyqtandyryldy. Jedel medıtsınalyq kómek qyzmetinde «Kómek» avtomattandyrylǵan basqarý júıesi engizildi. Barlyq mashınalar GPS navıgatsııamen qamtamasyz etilgen», - dedi basqarma basshysy.
Medıtsına salasyndaǵy qyzmet sapasynyń jaqsarýy oń nátıje bere bastaǵan. Máselen, 2018 jyly ana óliminiń kórsetkishi ótken jylmen salystyrǵanda 35,6 paıyzǵa, náreste ólim-jitim 9,5 paıyzǵa tómendedi. Al, qaterli isikterden bolatyn ólim-jitim 6,8 paıyzǵa, qan aınalym júıesi aýrýlarynan bolatyn ólim-jitim 9,4 paıyzǵa azaıdy. Sondaı-aq, týberkýlezden kóz jumǵandar 20 paıyzǵa kemidi.
Aıta keteıik, oblys ortalyǵy Túrkistan qalasyna aýysqaly, emhanalar jetispeýshiligi sezilýde. Osyǵan oraı aldaǵy ýaqytta 1 aýysymda 500 emdelýshige qyzmet kórsetetin qalalyq emhana salý josparlanýda. Odan bólek, Túrkistan qalasynda jedel járdem stansasy Túrkistan oblysynyń halqyna qyzmet atqarýyna baılanysty, zamanaýı ǵımarat, CALL-ortalyǵy, avtoturaqtary qajet etedi. Osyǵan baılanysty, Túrkistan qalasynda 500 myń shaqyrtýǵa arnalǵan Oblystyq jedel medıtsınalyq járdem kórsetý stansasynyń qurylysy josparlanýda.
