Túrkistan oblysynda eki mektep paıdalanýǵa berildi

TÚRKІSTAN. QazAqparat - Jańa jyl merekesiniń qarsańynda Túrkistan oblysynda eki bilim ordasy paıdalanýǵa berildi, dep habarlaıdy QazAqparat tilshisi.

Saryaǵash aýdany, Jemisti aýyldyq okrýgi, Tyń eldi mekeninde 300 oryndyq jańa mektep ǵımaraty oqýshylardy qabyldaýǵa ázir.

Bilim uıasy sońǵy úlgidegi zamanaýı jabdyqtarmen qamtylǵan.

Eki qabatty, birneshe bloktan turatyn ǵımaratta oqý synyptary, sport zaly, kitaphana, ashana, medıtsınalyq kabınet, kompıýterlik synyp jáne taǵy basqa kabınetter bar.

Al, Báıdibek aýdany Myńbulaq aýyldyq okrýgi Bestoǵaı aýylynda 100 oryndyq mekteptiń qurylysy aıaqtaldy.

Oblys ákimi Ómirzaq Shókeev atalǵan eldi mekenge arnaıy baryp, bilim uıasyn qadaǵalaýdan ótkizdi.

Qazirgi tańda syrtqy abattandyrý, qorshaý jumystary aıaqtalyp, terezesi ornatylǵan.

Syrtqy qasbeti ornatylyp, ishi árlengen. Mektep oqýshylardy qabyldaýǵa daıyn.

Zamanaýı bilim uıasyn aralap kórgen óńir basshysy mekteptiń jan-jaǵyn abattandyrý jóninde tapsyrma berdi.

Sondaı-aq, Túrkistan óńirinde 78 mekteptiń qurylysy qolǵa alynyp, otyzdan astamy el ıgiligine berilgenine toqtalyp, shalǵaıdaǵy eldi mekenderdi sapaly mekteptermen qamtý jumysy jalǵasatynyn jetkizdi.