Túrkistan oblysynda eki maqta óńdeý zaýyty salynyp jatyr
TÚRKІSTAN. QazAqparat - Túrkistan oblysynda 6 mlrd teńgeden astam qarajatqa eki maqta óńdeý zaýyty salynyp jatyr. Shardara aýdanynda ornalasqan eki kásiporyndy iske qosý osy qarasha, jeltoqsan aılarynyń sońyna josparlanyp otyr, dep habarlaıdy QazAqparat tilshisi.
«TURKISTAN INVEST» ınvestıtsııalyq kompanııasy baspasóz qyzmetiniń málimetinshe, zaýyttardyń birin salýǵa ınvestorlar 5 mıllıard 475 mıllıon teńge qarajat saldy.
Nysannyń jalpy aýmaǵy - 13 gektar. 250-300 adamdy jumyspen qamtıtyn kásiporynnnyń óndiristik qýaty jylyna 150 myń tonnaǵa jetedi. Daıyn ónim tolyqtaı Qytaı eline tasymaldanady. Búgingi kúni munda óndiristik ǵımarattardyń qurylysy júrgizilýde. Nysanǵa qajetti jabdyqtar men tehnıka jetkizilgen.
Al, ekinshi zaýyttyń qurylysyn qarjylandyrý ózbekstandyq ınvestıtsııalar esebinen júrgizilýde. Jobalyq quny 890 mln teńge bolatyn nysan «Shardara» ındýstrııaldyq aımaǵynda 10 gektar jerge salynýda. Óndiristik qýattylyǵy 50 myń tonna bolatyn zaýytta 50 jumys orny ashylady dep josparlanyp otyr. Qazirgi ýaqytta nysanda qurylys-montajdaý jumystary júrgizilýde.
Bul kompanııanyń ónimderi de Qytaıǵa eksporttalmaq.
