Túrkistan oblysynda eki qylmystyq top músheleri ustaldy
TÚRKІSTAN. QazAqparat - Túrkistan oblysynda qaraqshylyq shabýyl jasaýmen aınalysqan 2 qylmystyq top músheleri ustaldy, dep habarlaıdy QazAqparat tilshisi.
Oblystyq ІІD baspasóz qyzmetiniń málimetinshe, kúdiktiler Qazyǵurt aýdanynda shetel azamatyna qaraqshylyq shabýyl jasaǵan.
«Kúdiktiler betterine betperde kıip, jataqhanaǵa kirgen. Jábirlenýshini qarýmen qorqytyp, onyń baǵaly zattary men 90 myń teńge kóleminde aqshasyn alyp ketken. Atalǵan oqıǵa boıynsha QR QK-niń «qaraqshylyq» baby boıynsha sotqa deıingi birińǵaı tergep tekserý tizimine tirkeldi. Al, qyrkúıek aıynda qylmystyq toptyń bir múshesi sybaılasymen atalǵan aýdan turǵynynan jarty mıllıon teńge turatyn jylqysyn urlap ketken. Qazan aıynyń basynda osy top Saryaǵash aýdanyndaǵy janar-jaǵarmaı beketine qaraqshylyq shabýyl jasaǵan. Betterine betperde kıgen kúdiktiler joǵaryǵa oq atyp, kassadan 700 myń teńgege jýyq aqshany qoldy etken», - delingen habarlamada.
Oblystyq ІІD Krımınaldyq polıtsııa basqarmasynyń bastyǵy Qurmanbek Sahovtyń sózine qaraǵanda, atalǵan aýyr qylmystardy ashý úshin tájirıbeli jedel iz kesýshilerden quralǵan jedel-tergeý toby quryldy.
«Birneshe aı kóleminde kúdiktilerdiń túr-tulǵasy anyqtalyp, olardy ustaý is-sharalary júrgizildi. Bul qylmysty ashýdyń bir qıyndyǵy olar kópshiliginde qylmysyn betterine betperde kıip jasaǵan. Sondyqtan da jábirlenýshiler olardyń túr-tulǵasyn anyq beınelep bere almaǵan. Krımınaldyq polıtsııa basqarmasynyń qyzmetkerleriniń jedel-izdestirý is-sharalaryn júrgizý nátıjesinde Shymkent qalasyndaǵy jaldamaly páterlerden qylmystyq toptyń 6 múshesi anyqtalyp, ustaldy. Kúdiktilerdiń barlyǵy oblystyń turǵyndary bolyp shyqty. Olardan sholaq myltyq, pnevmatıkalyq tapansha jáne basqa da aıǵaqty zattar tárkilenip alyndy»,-deıdi Qurmanbek Sahov.
Sondaı-aq, Shymkent qalasynyń turǵyndarynan quralǵan taǵy bir qylmystyq top ustaldy. 8 qazan kúni túnde Túlkibas aýdanyndaǵy turǵynnyń biriniń úıine betterine betperde kıgen 6 adam kirip, qarýmen qorqytyp, aqshasyn alyp ketpek bolǵan. Úı ıesi qarsylyq kórsetken. Mundaıdy kútpegen seziktiler eshteme ala almaı qashyp, oqıǵa ornynda sholaq myltyq qaldyrǵan. Ustalǵandardyń ekeýiniń buryn sottalmaǵany anyqtalyp otyr.
Qazirgi tańda atalǵan jaıttar boıynsha Túrkistan oblysy ІІD tergeýshilerimen sotqa deıingi teregý amaldary júrgizilýde. Kúdiktilerdiń barlyǵy ýaqytsha ustaý abaqtysynda. Polıtseıler ustalǵandardyń basqa da aýyr qylmystarǵa qatystylyǵyn anyqtaýda.
