Túrkistan oblysynda eki kún ishinde tótenshe jaǵdaı tártibin buzǵan 253 jaıt anyqtaldy
TÚRKІSTAN. QazAqparat - Túrkistan oblysy polıtsııa departamentiniń jeke quramy eldegi tótenshe jaǵdaı bastalǵaly qyzmet atqarýdyń kúsheıtilgen rejımine kóshken bolatyn. Tártip saqshylary tarapynan qoǵamdyq tártipti qamtamasyz etý jáne tótenshe jaǵdaı rejımin buzýǵa jol bermeý boıynsha baqylaý kúsheıtilgen. Bul jóninde Túrkistan oblysy ákiminiń baspasóz qyzmetine silteme jasap QazAqparat habarlaıdy.
Soǵan qaramastan, nebary eki kúnniń ishinde óńirde 33 ákimshilik quqyq buzý faktisi anyqtaldy. 6 tártip buzýshy ákimshilik qamaýǵa alynsa, 15 adamǵa ákimshilik aıyppul salynyp, taǵy sonshasyna eskertý berildi. Qalǵanyna qatysty materıaldar sotqa joldandy.
Tártip saqshylary tótenshe jaǵdaıǵa qaramastan jumys istep turǵan monshany, túngi ýaqytta jumys istep turǵan bılıard ornyn anyqtady. Tártipke baǵynbaǵandar arasynda karantınge qaramastan blokposttan ótip ketýge tyrysqan avtokólik ıeleri ustalyp, is sotqa joldanǵan.
Osy ýaqyt arasynda 253 quqyq buzýshylyq anyqtalǵan. 100-den astam adam qamaýǵa alyndy. Tótenshe jaǵdaı kezinde dúkenderdiń, qoǵamdyq tamaqtaný jáne basqa da mekemelerdiń jumys tártibin buzýy men otbasylyq merekelerdi uıymdastyrýy jaıttardyń joly kesildi.
Túrkistan oblysynyń polıtseıleri halyqtyń qurylys jáne egis jumystaryna jumyldyrylǵan avtokólikterdiń, azyq-túlikpen, dári-dármekpen, medıtsınalyq buıymdarmen qamtamasyz etýmen qatar medıtsınalyq kómekke muqtaj adamdardy qospaǵanda karantındik rejımdi qatań saqtaýdy eskertip, asa qajettilik týyndamasa úıden shyqpaýǵa shaqyrady.
