Túrkistan oblysynda eki qoranyń órtenýine baılanysty qylmystyq is qozǵaldy
TÚRKІSTAN. QazAqparat - Túrkistan oblysy, Túlkibas aýdanynda eki qoranyń órtenip ketýine baılanysty qylmystyq is qozǵaldy. Bul týraly óńirdiń Polıtsııa departamenti resmı aqparat taratty, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, oqıǵa ornyna Túlkibas APB-niń 10-nan astam polıtsııa qyzmetkeri men prokýratýra ókilderi shyqqan.
«Qazirgi ýaqytta Túlkibas APB-men QK 202-baby «Bótenniń múlkin qasaqana joıý nemese búldirý« boıynsha sotqa deıingi tergeý amaldary júrgizilýde. Saraptama taǵaıyndaldy. Búginde oryn alǵan oqys oqıǵany anyqtap, qylmysty ashý maqsatynda tájirıbeli polıtsııa qyzmetkerlerinen jedel-tergeý toby quryldy. Olarmen órttiń naqty sebepterin aıqyndaý boıynsha is-sharalar kesheni júrgizilýde», - delingen habarlamada.
Aıta keteıik, buǵan deıin Tastumsyq aýylynda eki saraı órtenip, sharýanyń qysqa daıyndaǵan mal azyǵy túgelimen janyp ketkenin habarlaǵan bolatynbyz. Al, sharýalar bolsa tilsiz jaýdan 40 mln teńgedeı shyǵynǵa batqanyn aıtyp otyr. Olar sondaı-aq, eki qorany da kórshi aýyldyń bir turǵyny órtep jiberdi degen senimde. Alaıda bul boljamdy endi tártip saqshylary anyqtaıtyn bolady.
