Túrkistan oblysynda egistik alqabyna jumysqa ketken qyz iz-túzsiz joǵalǵan
JETІSAI. QazAqparat – Túrkistan oblysynda joǵalǵan boıjetken birneshe kúnnen keıin Almaty qalasynan tabyldy, dep habarlaıdy QazAqparat.
Jetisaı aýdandyq polıtsııa bólimine jergilikti turǵyn aryzdanyp, 20 jastaǵy qyzy tańǵy ýaqytta egistik alqabyna jumys isteýge ketip, 2 kúnnen beri tabylmaı jatqanyn aıtqan. Uıaly telefony óshirýli.
Atalǵan jaıtty tirkeýge alǵan jetisaılyq polıtseıler birden jedel áreketke kirisken.
«Kórgen-bilgenderden jaýap alyp, qyzdyń sýretin kórsetip, jaqyn aımaqtaǵy polıtseılerge de baǵytnama berildi. Qyzdyń dostary men barýy múmkin jerler tyńǵylyqty tekserildi. Polıtseılerdiń kúni-túni úzilissiz jumysynyń nátıjesinde qyz Almaty qalasynan tabyldy. Polıtseıler jas qyzdy otbasyna din-aman qaıtardy», - dedi oblystyq Polıtsııa departamentiniń baspasóz qyzmetinen.
Belgili bolǵandaı, iz-túzsiz joǵalǵan qyz aýyldaǵy tabysyn azsynyp, Almaty qalasyna jumysqa ketken. Onda jaldamaly páterge ornyǵyp, qaladaǵy dámhanalardyń birine jumysqa ornalasqan. Ata-anasy ózge qalaǵa ketýge ruqsat bermeıtinin oılaǵan boıjetken olarǵa habaryn bermegen.
Qyzdyń anasy polıtseılerge rızashylyǵyn jetkizgenin aıta keteıik.
