Túrkistan oblysynda egin orý naýqany bastaldy
TÚRKІSTAN. QazAqparat . Túrkistan oblysyndaKeles aýdanyndaǵy «Oshaqty» óndiristik kooperatıvi bıylǵy jyly 150 gektarǵa bıdaı astyq orýdy bastap ketti. Óndirilgen ónimdi Birlik aýylyndaǵy qoımaǵa jaıǵastyrýda, dep habarlaıdy QazAqparat Óńirlik kommýnıkatsııalar qyzmetine silteme jasap.
«Oshaqty» óndiristik kooperatıvi 1997 jyly qurylǵan. Quramynda egin sharýashylyǵynan basqa mal bordaqylaý pýnktteri bar iri kásiporynda jergilikti 90-ǵa jýyq turǵyn turaqty jumyspen qamtylǵan. Kóktemde jaýyn-shashyn kóp bolmaǵanyna qaramastan sharýanyń ónimi bitik shyqqan. Muny kooperatıv ıesi Mahanbet Qojaǵulov jerdiń qunarlyǵyna balap otyr. Sondaı-aq, sharýashylyqta jer jyrtý, tuqym sebý jáne jerdi óńdeý sekildi jumystar ýaqytynda qolǵa alynǵan. Sonyń arqasynda qazir qyrmanǵa mol astyq tasylyp jatyr. Agrotehnıkalyq talaptardy tııanaqty atqarǵan iri sharýashylyqtar qazir egistiktiń ár gektarynan 30-35 tsentnerge deıin ónim jınaýda.
