Túrkistan oblysynda egin egý naýqany bastaldy

TÚRKІSTAN. QazAqparat – Túrkistan oblysy Maqtaaral aýdanynyń dıqandary úıirgelik jerge qyzylsha tuqymyn egýdi bastady. Bul týraly QazAqparat ákimdiktiń baspasóz qyzmetine silteme jasap habarlaıdy.

«Pavlo», «boro», «vodan F1» suryptary shetelden ákelingen. Eki jarym aıdan keıin ónim bere bastaıtyn kókónistiń bul túrinen gektaryna 25-30 tonna ónim alýǵa múmkindik bar.

Qazirgi tańda dıqandar 10 gektarǵa qyzylsha tuqymyn ekken. Byltyr erte kóktemde ónim alǵan A.Qalybekov aýyldyq okrýginiń dıqandary Nur-Sultan, Almaty, Qaraǵandy qalalaryna qyzylsha ónimin satyp, Reseı memleketine eksportady. Osylaısha, mol tabysqa kenelgen sharýalar bıyl da eksport máselesine kóńil bólip otyr.

Atalǵan aýyldyq okrýgte 4632 gektar egistik jer bar. Baqsha ónimderin óndirýmen aty shyqqan okrýg byltyr 200 myń tonnaǵa jýyq qaýyn-qarbyz ónimderin eksportqa shyǵarǵan. Al, jańa meje sapaly ónim kólemin aıtarlyqtaı arttyrý.