Túrkistan oblysynda dinı konfessııa basshylarymen keleli keńes ótti
Óńir basshysy elimizde dinaralyq tatýlyqtyń kún sanap saltanat quryp kele jatqanyn aıtyp, oǵan naqty dálel retinde taıaýda Astanada «Dinı kóshbasshylar qaýipsiz álem úshin» taqyrybynda altynshy ret ótken álemdik jáne dástúrli dinder lıderleri sezindegi Memleket basshysy Nursultan Nazarbaevtyń sózin mysal etti.
«Elbasymyz óz sózinde «Dostyq joq jerde arazdyqqa múmkindik mol bolmaq. Sondyqtan izgilik, raqym, ımandylyq sekildi máńgilik uǵymdardy sanaǵa darytý arqyly adamdardy tazartý qajet. Adam túzelmeı zaman túzelmek emes. Búlingen zamandy túzeý adamnyń óz mindeti» - degen. Sondyqtan bizdiń búgingi basqosýymyz halyqtar dostyǵyna, ultaralyq, dinaralyq tatýlyqtyń nyǵaıa túsýine óz yqpalyn tıgizedi dep senemin. Sezd qorytyndysy boıynsha qabyldanǵan deklaratsııada oǵan qatysýshylar álemdik jáne dástúrli dinder kóshbasshylarynyń óshpendilik pen tózbeýshilikten týyndaǵan zorlyq-zombylyq qaqtyǵystardyń aldyn alýǵa, uzaq merzimdi turaqtylyqqa qol jetkizýge jan-jaqty járdemdesýge daıyn ekendikteri týraly málimdedi. Óz kezeginde men de Sizderdi jergilikti jerlerde mártebeli mıssııany jalǵastyrýǵa shaqyramyn», - dedi Janseıit Túımebaev.
Aımaq basshysy óńirdegi dinı konfessııa basshylarymen keleli keńes júrgizdi. Oblys aýmaǵynda dinı baǵytta júrgizilgen jumystar jóninde pikir almasty. Jıynda sondaı-aq Qazaqstan musylmandary dinı basqarmasy tóraǵasynyń birinshi orynbasary, naıb mýftı, QMDB Túrkistan oblysy boıynsha ókil ımamy Naýryzbaı Ótpenov, jergilikti pravoslav dinı birlestiginiń dinı qyzmetshisi Alekseı Drachev jáne basqa da din ókilderi sóz sóılep, oblystaǵy dinı ahýal jaıly oılaryn ortaǵa saldy.
Qabyldaý sońynda dinı konfessııalardyń jetekshilerine merekege oraı, alǵys hattar men syılyqtar tabystaldy.
