Túrkistan oblysynda dezınfektsııany durys jasaýdy úıretýde
TÚRKІSTAN. QazAqparat - Túrkistan oblysynda COVID-19 vırýsyna qarsy jáne indettiń aldyn alý maqsatynda dezınfektsııalaý jumystaryn júrgizý boıynsha oqytý sabaqtary júrgizilýde, dep habarlaıdy QazAqparat.
Óńirlik kommýnıkatsııalar qyzmetinen málim etkendeı, sondaı sharanyń birin «Ulttyq saraptama ortalyǵy» respýblıkalyq memlekettik kásipornynyń «Túrkistan oblysy boıynsha dezınfektsııa ortalyǵy», Túrkistan oblystyq «Jastar resýrstyq ortalyǵy» jáne «Aqparattyq taldaý ortalyǵy» KMM birlesip uıymdastyrdy.
Sabaq túrinde ótken sharaǵa atalǵan ortalyqtardyń qyzmetkerleri men erikti jastar qatysty. Ondaǵy maqsat – mekeme qyzmetkerlerin sanıtarlyq-epıdemıologııalyq jáne dezınfektsııalyq rejımde jumys isteýge beıimdeý.
Aıta keteıik, búgingi tańda oblysta dezınfektsııalaý sharalary kúndelikti baqylanyp, atqarylǵan jumystar aqparatyq sıtýatsııalyq ortalyqqa joldanýda.
Qazirge deıin adamdar kóp shoǵyrlanatyn 2481 nysanda dezınfektsııalaý jumystary júrgizildi. Onyń ishinde 29 bazar, 23 halyqqa qyzmet kórsetý ortalyǵy, 498 saýda ortalyǵy, 181 tamaqtaný nysany, 304 jalpy bilim beretin mektep, 19 ınternat, 614 mektepke deıingi balalardy oqytý men tárbıeleý mekemesi bar. Sondaı-aq, 3 balalar úıi, 29 orta jáne joǵary oqý orny, 285 emdeý aldyn alý mekemesi, 5 ońaltý ortalyǵy, 135 dárihana, 28 avtovokzal, 85 dinı meshit, 39 monsha, 45 shashtaraz, 6 saıabaq, 6 mal bazary, 323 qoǵamdyq kólik dezınfektsııalaýdan ótti.
