Túrkistan oblysynda daýylǵa qarsy jedel shtab demalysta da kúsheıtilgen rejımde jumys isteıdi

TÚRKІSTAN. QazAqparat - Túrkistan oblysynda daýylǵa qarsy jedel shtab demalys kúnderi de kúsheıtilgen rejımde jumys isteıdi, dep habarlaıdy QazAqparat tilshisi.

Túrkistan oblysynda qatty daýyl saldarynan birneshe aýdan, qalada qaýipti jaǵdaı qalyptasqandyqtan Túrkistan oblysy tótenshe jaǵdaılar departamentinde jedel shtab qurylǵan bolatyn.

Oblys ákiminiń orynbasary Beısen Tájibaev shtab otyrysyn ótkizip, aldaǵy demalys kúnderi qaýipsizdik sharalaryn kúsheıtýdi, táýlik boıy kezekshilik uıymdastyrýdy tapsyrdy.

«Túrkistan, Kentaý qalalary men birneshe aýdanda jeldiń ekpini báseńdemeı tur. Shtab quramyndaǵy departamentter men basqarma ókilderi jaǵdaıdy baqylaýda ustap, kúrdeli jaǵdaı týyndasa shuǵyl áreket etý úshin árdaıym tyǵyz baılanysta bolǵany jón. Ekinshiden, aldaǵy demalys kúnderi júzdegen adam óńirimizdegi taýly aımaqtarǵa demalysqa shyǵady. Olar qaýipsizdik talaptaryn saqtamasa, órt qaýpi týyndaýy múmkin. Al myna daýylda órtti sóndirý qıyn. Sondyqtan demalys oryndary men taýly aımaqtarda baqylaýǵa alynǵany durys», – dedi Beısen Tájibaev.

Shtab otyrysynda Túrkistan oblysy Tótenshe jaǵdaılar departamenti bastyǵynyń orynbasary Erik Sarybaev 5 mamyrdaǵy ahýaldy baıandady. Onyń aıtýynsha, daýyl soǵyp jatqan aýmaqtarda mamandar jumys istep jatyr. Jaǵdaı baqylaýda. Tıisti aqparattandyrý jumystary júrgizilgen.

«Qazgıdromet» mekemesi daýyldy jel ekpini 6 mamyrda da saqtalady dep boljap otyr. Óńirde Túrkistan oblysynyń Tabıǵı resýrstar jáne tabıǵat paıdalanýdy retteý basqarmasyna qarasty orman sharýashylyqtary, Aýyl sharýashylyǵy basqarmasyna qarasty sý qoımalar bar. Atalǵan basqarmalar tarapynan da órtke, tótenshe jaǵdaıǵa qarsy kezekshilik kúsheıtilgeni jón», – dedi ol.

Búginde Kentaý qalasyndaǵy mektepter qashyqtyqtan oqytýǵa kóshirildi. Saýran aýdany men Túrkistan qalasyndaǵy birneshe mektepte de oqý onlaın júıesine aýystyrylǵan.

Túrkistan oblysynda 4 mamyrdan bastap aýa-raıynyń kúrt nasharlap, jel ekpini 21-24 m/s jetýine baılanysty 2 qalada Túrkistan, Kentaý qalalarynda jáne Saýran, Báıdibek, Saıram, Túlkibas aýdandarynda elektr energııasynyń jappaı sónýi, keıbir aýdandarda ǵımarat shatyrlarynyń jelmen ushý derekteri tirkeldi.

Túrkistan oblysynda jeldiń eń qatty ekpini taýly aýdandarda kezdesip, 20-28 m/s deıin jetip otyr. Al Túrkistan qalasyndaǵy eń ekpindi jel qýaty 28 m/s boldy.

Oblysta elektr jaryǵy sóngen aýdan, qalalarda qarqyndy jumys júrip jatyr. Báıdibek, Saıram jáne ózge de aımaqtardyń basym bóliginde elektr jelileri qalpyna keltirildi.

Qazirgi tańda elektrge qosylmaǵan 1360 abonent qalyp otyr. Mamandar bul kórsetkish saǵat saıyn ózgerip jatqanyn, elektr máselesinde asa túıtkildi apat bolmaǵanyn, jaǵdaı tez qalypqa keletinin jetkizdi.

Al shatyry ushqan bilim uıalarynyń máselesi nazarǵa alynyp, esepteý-túgeldeý jumystary júredi. Odan keıin tolyq qalpyna keledi.

Tótenshe jaǵdaı departamentiniń ókilderi turǵyndarǵa shatyrlardan, elektr baǵanalarynan, aǵashtardan jáne jelmen ushyp adamǵa zııan tıgizetin zattardan alshaq júrý, balalardy múmkindiginshe dalaǵa shyǵarmaý, ashyq jerde ot jaqpaý kerektigin eskertedi.

Aıta keteıik, budan aldyn Kentaýda jelmen ushqan mektep shatyrynyń bóligi muǵalimniń basyna túskenin jazǵan bolatynbyz.