Túrkistan oblysynda dárigerler medıtsınalyq týrızmdi damytýǵa atsalysýda
TÚRKІSTAN. QazAqparat – Túrkistan oblysynda dárigerler medıtsınalyq týrızmdi damytýǵa atsalysýda. Qazir oblystyq klınıkalyq aýrýhananyń qyzmetine Qyrǵyzstan, Tájikstan jáne Ózbekstan elderiniń azamattary júginýde, dep habarlaıdy QazAqparat tilshisi.
Atalǵan aýrýhana búginde oblys turǵyndaryna mamandandyrylǵan jáne joǵary medıtsınalyq kómek kórsetedi. Óńirdegi jetekshi medıtsınalyq ortalyq jyl sanap sheteldik naýqastardy da emdeýde. Máselen, ótken jyly 100-ge jýyq shetel azamaty em qabyldaǵan. Shet tilin meńgergen 30-ǵa jýyq maman ózge memleketterden kelgen naýqastarǵa joǵary deńgeıde qyzmetterin usynǵan. Joǵary bilikti dárigerler, sondaı-aq, jyl saıyn neırohırýrgııa, ortopedııa, ota jasaý, sáýlelik dıagnostıka syndy klınıkalyq joldamalar boıynsha Reseı, Germanııa, Ýkraına, Úndistan, Ońtústik Koreıa, Ispanııa jáne Izraıl memleketterinde biliktiligin arttyryp keledi.
Odan bólek sheteldik dárigerler osynda kelip, jergilikti áriptesterimen tájirıbe almasyp otyrady.
Qazirgi tańda oblystyq klınıkalyq aýrýhanaǵa qarasty 2 emhana jáne 18 bólimde 1800-ge jýyq qyzmetker jumys isteıdi. Óńirge qarasty barlyq aýdan-qala turǵyndaryna joldama arqyly tegin medıtsınalyq qyzmetter usynylady. Shalǵaı aýylda turatyn naýqastardyń jaǵdaıy shuǵyl kómekti qajet etse, aýrýhanaǵa sanıtarlyq avıatsııa arqyly jetkiziledi.
