Túrkistan oblysynda dári-dármekti zańsyz satýdyń 23 faktisi anyqtaldy
Prokýratýranyń málimetinshe, oblysta prokýratýranyń, polıtsııa, sybaılas jemqorlyqqa qarsy is-qımyl departamenti, ekonomıkalyq tergeý, memlekettik kirister jáne farmatsevtıkalyq baqylaý departamentteri qyzmetkerlerinen mobıldi toptar qurylǵan.
Atalǵan top 8-17 shilde aralyǵynda tekserý júrgizip, 23 fakti anyqtaǵan. Onyń ishinde jeke tulǵalardyń dárilik zatty alyp-satýynyń 5 faktisi jáne dárihanalarda dárilik zattardy qymbat baǵamen satýdyń 18 faktisi tirkelgen.
«50 myń teńgeden astam somaǵa tárkilenýge jatatyn dárilik jáne basqa da medıtsınalyq zattardyń 396 qaptamasy men 4 449 danasy aınalymnan alyndy. Anyqtalǵan zańbuzýshylyqtar boıynsha kináli tulǵalarǵa qatysty qujattar ýákiletti organǵa joldandy. Búgingi tańda 9 fakt boıynsha aıyppul salynsa, 4 qujat sotqa joldandy. Bul baǵyttaǵy jumys áli de jalǵasýda» delingen habarlamada.
Dári-dármekti alyp-satý jáne olardy kóterińki baǵamen satýdyń kez kelgen faktilerin 87015525525 baılanys nómiri men 87782255221 WhatsApp jelisi arqyly habarlaýǵa bolady.