Túrkistan oblysynda dári-dármekti qymbattatyp satýdyń 19 faktisi anyqtaldy

TÚRKІSTAN. QazAqparat – Túrkistan oblysynyń polıtseıleri karantın ýaqytynda qajetti dári-dármekti joǵary baǵamen satqan dárihana qyzmetkerleri men turǵyndardy anyqtaý maqsatynda arnaıy reıd júrgizýde, dep habarlaıdy QazAqparat tilshisi.

Oblystyq PD baspasóz qyzmetiniń málimetinshe, tártip saqshylary 5 shildeden bastap osyndaı 19 jaıtty tirkegen. Atap aıtqanda, Jetisaı men Tólebı aýdandarynda belgilenbegen orynda dári-dármek satý boıynsha 4 fakti anyqtalǵan.

Sondaı-aq, dárihanada qymbat baǵamen dári-dármek satýdyń 15 jaıty tirkelgen. Osy zańbuzýshylyqtarǵa qatysty hattama toltyrylyp, oblystyq taýarlar men kórsetiletin qyzmetterdiń sapasy men qaýipsizdigin baqylaý departamentine 17 jaıt boıynsha qujattar joldanǵan.

Aıǵaq retinde 1500-ge jýyq dári-dármek pen 4982 dana betperde, 10 dana qolǵap alynǵan.

Tárkilengen dárilerdiń arasynda «Tseftrıakson», «Nol Grıpp», «Ketanov», «Tetratsıklın», «Platımazol», «Dımedrol», «Mezım», «Taılol hot», «askorbın qyshqyly» jáne basqa preparattar bar.

Al, Tólebı aýdanyndaǵy dárihananyń satýshysy «azıtromıtsın», «aspırın» «paratsetomol», «kson» men «mezım forte» dárilerin qymbat baǵamen satý barysynda ustalǵan.

Ol óz túsiniktemesinde jeke basynyń paıdasy úshin atalǵan dárilerge ústeme aqsha qosyp satqanyn jetkizdi.

Bul jaıt Tólebıde tirkelip, zańdylyǵyn tekserý úshin tıisti basqarmaǵa joldanǵan.