Túrkistan oblysynda burynǵy sheneýnik para alý kúdigine ilikti

NUR-SULTAN. QazAqparat – Báıdibek aýdany jer qatynastary bóliminiń burynǵy basshysy para aldy dep kúdiktelýde. Bul týraly QR Sybaılas jemqorlyqqa qarsy is-qımyl agenttiginen málim etti, dep habarlaıdy QazAqparat.

Túrkistan oblysynyń sybaılas jemqorlyqqa qarsy qyzmeti Báıdibek aýdanynyń «Turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi» MM sektor meńgerýshisine qatysty sotqa deıingi tergeý bastady. Ol ákimdiktiń «Jer qatynastary bólimi» MM basshysy laýazymyn atqarǵan merzimde sybaılas jemqorlyq qylmysyn jasady degen kúdikke ilindi.

«Atalǵan laýazym ıesi 2019 jyldyń qyrkúıek aıynda jaıylym úshin jer ýchaskesin bólgeni úshin azamattan buryn alynǵan 400 myń teńge mólsherinde parany qaıtarý kezinde áshkerelengen. Kúdiktiniń jáne onyń qorǵaýshysynyń sotqa deıingi jedeldetilgen tergeý júrgizý týraly ótinishhatyna baılanysty protsessýaldyq ustaý qoldanylǵan joq. Kúdiktige qatysty túpkilikti sheshimdi onyń kinásiniń deńgeıin anyqtaý arqyly sot qabyldaıtyn bolady», - delingen habarlamada.