Túrkistan oblysynda búgin de jaýyn jaýyp, ózenderde sý deńgeıi kóteriledi
TÚRKІSTAN. QazAqparat - Tótenshe jaǵdaı mınıstrliginiń bólimsheleri túni boıy sý sorý jáne ınertti materıaly bar qapshyqtardy tóseý jumysyn jalǵastyrdy, dep habarlaıdy QazAqparat.
Sonymen qatar, «Qazgıdromet» RMK dereginshe, 3 aqpan Túrkistan oblysynyń kóp bóliginde jaýyn-shashyn jaýady, sondaı-aq temperatýra joǵarylap, qar qarqyndy erıdi.
Erigen qar sýynan aǵyn paıda bolady, muz álsirep, ózenderdegi sý deńgeıi kóteriledi.
Eske sala keteıik, óńirdegi Kentaý, Túrkistan qalalarynda jáne Báıdibek, Saýran, Ordabasy aýdandarynda jaýyn-shashynnan kósheler men aýlalardy sý basyp jatqanyn habarlaǵan edik.
Tasqyn sý Saýran aýdanyndaǵy eldi mekenderge qaýip tóndirip tur. Sý tasqynyna baılanysty Saýranda mektep oqýshylary onlaın oqýǵa kóshti jáne 7 balabaqsha jumysyn toqtatty.
Túrkistan oblysynyń úsh aýdanynda 6 kósheni sý basqan.
Óńirde kóligimen tasqyn sý ortasynda qalyp qoıǵan turǵyndar qutqaryldy. Túrkistan oblysynyń ákimi tasqyn sý kirgen eldi meken turǵyndarymen kezdesti.
Biz sondaı-aq Kentaý qalasy men Saýran aýdanynda tótenshe jaǵdaı jarııalanýy múmkin ekenin jazdyq.
4 eldi mekende sý burý jumystary júrgizilip jatyr, turǵyndar úshin «jedel jeli» iske qosyldy.
