Túrkistan oblysynda boranda jolda qalǵan jolaýshylar qutqaryldy
TÚRKІSTAN. QazAqparat - Túrkistan oblysynda boranda jolda turyp qalǵan tehnıkalar men jolaýshylar qutqaryldy. Oblystyq TJD Órt sóndirý qyzmetiniń kúshimen Jambyl oblysy Amangeldi aýylynyń janynda tas jol boıynda turyp qalǵan 3 tehnıka shyǵarylyp, 11 adam evakýatsııalandy, dep habarlaıdy QazAqparat tilshisi.
Oblystyq TJD málimetinshe, keshe Jambyl oblysynda aýa raıynyń buzylýyna baılanysty keshki saǵat 19:20-dan bastap «Almaty-Tashkent-Termez» respýblıkalyq mańyzy bar avtokólik jolynyń 593-632 shaqyrymynda (Túlkibas aýdany Jaskeshý aýylynan Jambyl oblysynyń shekarasyna deıin) barlyq avtokólik túrlerine jol qozǵalysy jabylǵan bolatyn.
Al, búgin túngi saǵat 01.50-de atalǵan ýchaskede barlyq avtokólik túrlerine jol qozǵalysy ashyldy. Degenmen jol boıynda kezekshilik etken tótenshe jaǵdaılar qyzmetiniń ókilderi shekteý kezinde Túlkibas aýdanynyń Jambyl oblysymen shekarasynda 40 tehnıka, 135 adam jol boıynda turǵandaryn baıqaǵan. Alaıda bul jolaýshylar kómekke muqtaj emestigin, tek joldyń ashylýyn kútip jatqanyn aıtqan.
Soǵan qaramastan respýblıkalyq mańyzy bar avtokólik jolynda 4 jylytý beketi - Túlkibas aýdany Shaqpaq aýylynda - 2, T.Rysqulov aýylynda - 2 aldyn ala daıyndalǵan. Budan bólek avarıalyq-qutqarý jáne kezek kúttirmeıtin jumystarǵa Túrkistan oblysy TJ departamentiniń, jergilikti atqarýshy organdarynyń, jergilikti polıtsııa qyzmetiniń jáne Qazavtojoldan jalpy 29 adam, 13 tehnıka jumyldyrylǵan. 
