Túrkistan oblysynda boran: 44 eldi meken jaryqsyz qalyp, joldar jabyldy

TÚRKІSTAN. QazAqparat - Túrkistan oblysynda qatty boran saldarynan Túrkistan qalasy men 8 aýdanda elektr jelileri úzilip, jaryq sónip qaldy. Qazir 44 eldi meken turǵyndary jaryqsyz otyr, dep habarlaıdy QazAqparat tilshisi.

Qarly boran saldarynan búgin Mashat taý shatqalynan Jambyl oblysyna deıingi jáne Báıdibek pen Sozaq aýdandary arasyndaǵy jol qozǵalysy toqtatyldy. Sondaı-aq Sholaqqorǵannan Aşysaıǵa deıingi joldar jabyldy. Óńirde Túrkistan qalasy men 8 aýdandaǵy 44 eldi mekende elektr jelileri úzilip, jaryq sónip qaldy. Qazyǵurt asýynda da jol júrý birshama qıyndyqtar týǵyzýda. Qazir munda tasjolǵa tuz ben qum sebilip, arnaıy tehnıka tańerteńnen beri joldy tazartyp jatyr. Bul jumystarǵa 16 tehnıka jumyldyrylǵan.

Al oblystyq tótenshe jaǵdaılar qyzmeti shuǵyl sharalar qabyldap, kúsheıtilgen jumys tártibine kóshti. Jurtty alys saparǵa shyqpaýdy eskertýde.

«Osy aýa raıynyń ózgerýine baılanysty TJD bazasynda oblystyq shtab quryldy. Jáne bir qala segiz aýdanda elektr jaryǵy óshken jáne joldardyń jabylýy oryn alyp jatqan aýdandarda saqtyq sharalary jumystar júrgizilýde», - deıdi oblystyq TJD bastyǵynyń orynbasary Erik Sarybaev.