Túrkistan oblysynda BMW polıtseılerdiń eki qyzmettik kóligin soǵyp ketti
TÚRKІSTAN. QazAqparat - Túrkistan oblysynda kóktaıǵaqtan toqtaı almaǵan jeńil kólik jol jıeginde turǵan polıtseılerdiń qyzmettik kóligin soǵyp ketti. Bul kórinis áleýmettik jelige tarap, atalǵan jazbaǵa sáıkes polıtseıler arnaıy tekserý jumystaryn júrgizdi, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, ishki ister organdarynyń barlyq jeke quramy joldarǵa bóliný arqyly kedergilerge tap bolǵan kólikterge kómek kórsetken. Sondaı sátte júrgizýshiler men jolaýshylarǵa kómek kórsetip jol jıegine qoıylǵan polıtseılerdiń qyzmettik kóligin jeńil avtokólik soǵyp ketken.
«Bul oqıǵa 14 naýryzynda Shymkent-Samara tasjolynyń 49-50 shaqyrymynda saǵat 17:15 shamasynda oryn alǵan. Oblystyq PD JPQ patrýldik polıtsııa batalonynyń polıtseıleri ózderiniń qyzmettik kólikterimen aýa raıynyń qolaısyzdyǵyna baılanysty jerdiń taıǵaqtyǵynan joldy jaýyp qalǵan kólikterdi shyǵarǵan. Osy kezde «BMV» markaly avtokóliginiń júrgizýshisi, Shymkent qalasynyń turǵyny basqarý júıesin ıgere almaı qalǵan. Sóıtip polıtsııanyń eki birdeı «KIA RIO» markaly qyzmettik kóligin soqqan. Adam shyǵyny joq» delingen habarlamada.
Búgingi tańda atalǵan jaıt tirkeýge alynyp, tekserý amaldary júrgizilýde. Júrgizýshiler tıisti medıtsınalyq kýálandyrýdan ótip, onyń qorytyndysy boıynsha júrgizýshiler ishimdik ishpegeni anyqtalǵan. Sondaı-aq «BMV» markaly kóliginiń ıesine QR ÁQBtK-niń 610 babynyń 1-bóligimen (Kólik quraldary júrgizýshileriniń jol júrisi qaǵıdalaryn adamdardyń densaýlyǵyna zııan keltirýge, kólik quraldarynyń nemese ózge de múliktiń búlinýine alyp kelgen buzýshylyǵy) hattama toltyrylǵan.
