Túrkistan oblysynda «Biz birgemiz!» aktsııasy aıasynda muqtaj jandarǵa kómek kórsetildi
Turǵyndarǵa antıseptıkalyq quraldar men medıtsınalyq maskalar jáne birinshi kezekte qajetti ónimder men azyq-túlik tapsyrylyp jatyr, dep habarlaıdy QazAqparat tilshisi.
Ekinshi Dúnıejúzilik soǵys ardagerlerine, kópbalaly otbasylar, jalǵyz ilikti analarǵa antıseptıkter, medıtsınalyq jáne gıgıenalyq zattar men azyq-túlik taratylýda. «Nur Otan» partııasy respýblıkalyq deńgeıde koronavırýske qarsy kúresti kúsheıtý, turǵyndarǵa kómektesý maqsatynda Elbasynyń bastamasymen «Biz birgemiz!» respýblıkalyq aktsııasyn jarııalaǵany belgili. Oblys ákimi Ómirzaq Shókeev «Biz birgemiz!» respýblıkalyq aktsııasyn júzege asyryp jatqan «Nur Otan» partııasy Saıram aýdandyq fılıalynyń músheleri men eriktilermen kezdesti. Aýdan kóleminde 130 otbasy atalǵan kómekke qol jetkizdi.
Qaterli indetke qarsy kúresti kúsheıtip, kómekke asa muqtaj jandarǵa qol ushyn sozýdy quptaǵan qaıtarymdy is barysynda «Nur Otan» partııasy Túrkistan oblystyq fılıaly men oblystyq jumyspen qamtýdy úılestirý jáne áleýmettik baǵdarlamalar basqarmasy asa muqtaj 1300-deı azamattyń tizimin jasaqtady.
Elbasy N.Nazarbaev Úndeýinde qıyn kezeńde el-jurtqa kómekteskisi keletin adamdardyń qarajaty jınaqtalatyn respýblıkalyq qor qurýdy usyndy. Túrkistan oblysynda Arystaǵy tótenshe jaǵdaı oryn alǵan kezde nátıjeli jumys istegen «Túrkistan» korporatıvtik áleýmettik damý qory tańdalyp alyndy. Atalǵan qorǵa oblys ákimdigi, basqarmalar men oǵan qarasty mekemeler búgin bir kúndik jalaqylaryn aýdarady.
«Túrkistan» korporatıvtik áleýmettik damý qorynyń janynan qamqorshylyq keńesi quryldy. Onyń quramyna «Nur Otan» partııasynyń, «Atameken» kásipkerler palatasynyń jáne Ardagerler keńesiniń ókilderi engizilgen. «Biz birgemiz!» aktsııasynyń oryndalýy oblys ákimi, «Nur Otan» partııasy Túrkistan oblystyq fılıalynyń tóraǵasy Ómirzaq Shókeevtiń tikeleı baqylaýynda bolady.
