Túrkistan oblysynda bıyl jańadan salynǵan 44 mektep paıdalanýǵa beriledi
TÚRKІSTAN. QazAqparat - Túrkistan oblysynda bıyl 51 mekteptiń qurylysy júrgizilip, jyl sońyna deıin onyń 44-i paıdalanýǵa beriledi. Bul týraly oblystyq Adamı áleýetti damytý basqarmasynyń basshysy Raqymbek Jolaev málimdedi, dep habarlaıdy QazAqparat tilshisi.
Basqarma basshysynyń sózinshe, óńirdegi 900 mekteptiń 173-i yńǵaılastyrylǵan ǵımarattar. Aldaǵy ýaqytta olardy jańartý kózdelip otyr.
«Aǵymdaǵy jyly basqarma tarapynan úsh aýysymǵa ótý qaýpi bar mektepterge taldaý júrgizilip, aýdan-qalalarda ornalasqan 52 mektep anyqtalyp otyr. Sol sebepten, 2025 jylǵa deıin transfertter esebinen memlekettik - 107 mekteptiń, memlekettik-jekemenshik áriptestik aıasynda - 15 mekteptiń, jekemenshik - 27 mekteptiń qurylysyn salý josparlanýda. Qazirgi tańda 6 apatty jáne 4 úsh aýysymdy mektep bar. Bıyl sol 2 apatty jáne 2 úsh aýysymdy mekteptiń qurylysy bastalyp, aǵymdaǵy jyly paıdalanýǵa berilmek. 2021-2023 jyldar aralyǵynda qalǵan 4 apatty jáne 2 úsh aýysymdy mekteptiń qurylys jumystary tolyǵymen aıaqtalatyn bolady», - dedi basqarma basshysy.
Sondaı-aq, Rahymbek Jolaev óńirde aýylda turatyn oqýshylarǵa arnalǵan «Myń bala» ulttyq olımpıadasy jaıly baıandap ótti. Onyń sózinshe, «Myń bala» olımpıadasy eki kezeńnen turady. Alǵashqy kezeńde logıkalyq jáne keńistiktik oılaýdy baǵalaý men onlaın formatta testileý ótkiziledi. Óńirler boıynsha eń joǵary qorytyndy ball jınaǵan 5 myń oqýshy olımpıadanyń ekinshi kezeńine joldama alady. Ekinshi kezeńde qatysýshylar matematıkalyq saýattylyq, akademııalyq bilimdi baǵalaý úshin kompıýterlik testileýden ótedi. Ekinshi kezeń óńirlik testileý ortalyqtary bazasynda uıymdastyrylady.Bul olımpıadaǵa oblys boıynsha 61 myń bala qatysady dep kútilýde.
«Olımpıadıaǵa oqýshylardy tirkeý 24 aqpan-24 naýryz aralyǵynda jalǵasady. Jarys jeńimpazdary elimizdiń daryndy balalarǵa arnalǵan jetekshi mektepterinde «Bilim-Innovatsııa» lıtseılerinde, Respýblıkalyq fızıka-matematıka mektebinde jáne «Daryn» mamandandyrylǵan mektebinde oqýǵa múmkindik alady. Olımpıadanyń 5 myń fınalısi Elbasy Akademııasynyń «Virge oqý» onlaın-mektebinde tegin oqı alady. Olımpıadaǵa Qazaqstannyń aýyldyq mektepterinde sońǵy eki oqý jylynda bilim alyp jatqan 5 jáne 6-synyp oqýshylary qatysady», - dedi Raqymbek Qýatbekuly.
