Túrkistan oblysynda bıyl aıtýly rýhanı sharalardy ótkizý josparlanǵan

TÚRKІSTAN.QazAqparat – Túrkistan qalasynda qazan aıynda Túrki elderi basshylarynyń jıyny ótedi dep josparlanyp otyr. Bul shara – kúlli Túrki halyqtarynyń rýhanı-mádenı ortalyǵy – Túrkistan qalasynyń týrızmin jańa baǵytta damytýǵa, týrısterdiń kóptep kelýine yqpal etedi, dep habarlaıdy QazAqparat tilshisi.

Oblys ákimi Ómirzaq Shókeevtiń sózinshe, 148 is-shara iske asyrylmaq. Jalpy, keshendi josparǵa enip otyrǵan jobalardy iske asyrýdyń Túrkistan oblysy úshin mýltıplıkatıvtik áseri zor bolmaq.

«Elbasynyń tapsyrmasyna sáıkes ótkizilýi halyqaralyq deńgeıde josparlanyp otyrǵan bul is-sharaǵa oblystyń árbir turǵynyn óz úlesin qosyp, atsalysýǵa shaqyramyn. Ózderińizge belgili, bıyl Ábý Nasyr ál-Farabıdiń 1150 jyldyǵy, Altyn Ordanyń 750 jyldyǵy, Abaıdyń 175 jyldyǵy, Uly Jeńistiń 75 jyldyǵy jáne kompozıtor Shámshi Qaldaıaqovtyń 90 jyldyǵyna arnalǵan aýqymdy is-sharalar ótkizý josparda bar. Bul óz kezeginde oblystyń rýhanı ómirine aıtarlyqtaı úles qosady dep senemin»,- dedi aımaq basshysy.

Aıta keteıik, kúni keshe oblys ákimi el aldynda esep berý jıynyn ótkizgen bolatyn. Mańyzdy sharaǵa Qazaqstan Respýblıkasy Prezıdenti Ákimshiliginiń memlekettik ınspektory Serik Qojanııazov arnaıy qatysyp, oblys ákiminiń ótken jylǵy atqarǵan jumystarynyń nátıjesine oń baǵasyn berdi.