Túrkistan oblysynda bıyl 55 myńdaı bala 1-synypqa barady
TÚRKІSTAN. QazAqparat - Túrkistan oblysynda 2018-2019 jańa oqý jylynda 1 381 balabaqsha, 907 mektep jáne 94 kolledj jumys isteıtin bolady. Bul týraly Oblystyq bilim basqarmasynyń basshysy Isataı Saǵyndyqov málim etti, dep habarlaıdy QazAqparat.Bilim basqarmasy basshysynyń sózinshe, óńirdegi bilim berý uıymdarynyń jańa oqý jylyna daıyndyq jumystary josparly túrde júrgizilýde.
«Aǵymdaǵy jóndeý jumystaryna 105,5 mln teńge bólinip, bilim mekemelerinde ákteý, syrlaý jumystary júrgizilip, qazir olardyń jartysynan astamy jańa oqý jylyna daıyn. Barlyq bilim nysandaryn 25 tamyzǵa deıin aıaqtaý josparlanýda. 2018 jyly 47 bilim nysanynyń kúrdeli jóndeý jumystaryna oblystyq jáne jergilikti bıýdjetten 4,3 mlrd teńge bólingen. Onyń 40-y mektep, 1-eýi mektep-ınternat, altaýy kolledj», - dedi Isataı Saǵyndyqov.
2018-2019 oqý jylynda óńirimizde 54 915 búldirshin mektep tabaldyryǵyn attaıdy. Jańartylǵan bilim berý mazmunyna 3, 6, 8 synyptarynyń kóshýine baılanysty oqýlyqtardy satyp alýǵa jáne jetkizýge jergilikti bıýdjetten 4,9 mlrd teńge bólindi.
Sondaı-aq, 1 tamyz ben 30 qyrkúıek aralyǵynda «Mektepke jol» dástúrli respýblıkalyq qaıyrymdylyq aktsııasy ótedi dep josparlandy. Atalǵan shara aıasynda 2017 jyly oblystaǵy turmysy tómen jáne kópbalaly 26 749 otbasy jáne jetim balalar men ata-anasynyń qamqorlyǵynsyz qalǵan balalarǵa jalpy quny 314 mln teńge kóleminde materıaldyq kómek kórsetilgen.
Aıta keterligi, oblystyq bilim basqarmasyna qarasty «Taý samaly» oblystyq mamandandyrylǵan oqý-saýyqtyrý ortalyǵy kommýnaldyq menshikten memlekettik múlikti tapsyrý erejesine sáıkes, múliktik keshen retinde «Baldáýren» respýblıkalyq oqý-saýyqtyrý ortalyǵynyń menshigine ótkizildi. Endi «Taý samaly» ortalyǵy Qazaqstannyń barlyq aımaǵynan, atap aıtqanda Almaty, Túrkistan oblysy sııaqty halqy tyǵyz ornalasqan aımaqtardan balalardy barynsha qamtýǵa múmkindik beredi. «Taý samaly» ortalyǵynyń «Baldáýren» ROSO esebine berilýi qyzmetkerler birliginiń saqtalýyn qamtamasyz etedi jáne atalǵan aýdan turǵyndary úshin qosymsha jumys oryndary ashylatyn bolady.
