Túrkistan oblysynda bıyl 311 myń oqýshy jazǵy demalyspen qamtylady
TÚRKІSTAN. QazAqparat - Túrkistan oblysynda bıyl 311 myń oqýshy jazǵy demalyspen qamtylady. Bul týraly oblys ákimdigi janyndaǵy Kámeletke tolmaǵandardyń isi jáne olardyń quqyqtaryn qorǵaý jónindegi komıssııa májilisinde aıtyldy, dep habarlaıdy QazAqparat.
Oblys ákiminiń orynbasary Málik Otarbaevtyń tóraǵalyǵymen ótken jıynnyń kún tártibinde 3 másele talqylandy. Birinshi másele boıynsha oblystyq Túrkistan oblystyq bilim basqarmasy basshysynyń mindetin atqarýshy Ardaq Sadyqovanyń baıandamasy tyńdaldy.
Ol jazǵy demalys kezinde oqýshylardyń qaýipsizdigin saqtaý, bos ýaqytyn tıimdi ótkizý jáne qıyn toptaǵy balalar úshin uıymdastyrý jumystary týraly baıandady. Onyń aıtýynsha, bıyl oblystaǵy 23 saýyqtyrý lagerinde 8 aýysymda 33 myń bala qabyldanady. Al respýblıkalyq lagerlerde óńirden 1 100 bala demalmaq. Oblystaǵy 902 mektep janyndaǵy lagerde de oqýshylar tynyǵady. Jalpy 1-10 synyp aralyǵyndaǵy 443 661 oqýshynyń 311 myńyn, ıaǵnı 70 paıyzyn mektep janyndaǵy jáne qala syrtyndaǵy saýyqtyrý oryndarymen qamtý josparlanyp otyr. Sonymen birge, oqýshylardyń túrli úıirmelerge, mádenı is-sharalarǵa, sport sektsııalaryna qatysýlaryna jaǵdaı jasalady.
Májiliste oblystyq Otbasy, balalar jáne jastar isteri jónindegi basqarmasy basshysynyń orynbasary Marat Sádibek jastardyń básekege qabilettiligin arttyrýǵa qoldaý kórsetý is-sharalary jóninde aıtyp berdi. Al oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Nurjan Nurashov kásiptik lıtseı men kolledj túlekterin jumyspen qamtý jáne áleýmettik qoldaý, kásibı oqýǵa jiberý sharalary týraly baıandady.
Balalar tárbıesine, olardyń jan-jaqty damýyna qoldaý kórsetilý kerektigin aıtqan Málik Otarbaev osy salada kemshilik jibergen birqatar jaýapty basshylarǵa jumysty shıratýdy tapsyrdy.
«Qazirgi tańda qoǵamnyń aldynda turǵan basty mindetterdiń biri - balalar men jasóspirimder arasyndaǵy quqyqbuzýshylyqtyń aldyn-alý. Bul sala oblys ákimi Ómirzaq Shókeevtiń tikeleı qadaǵalaýynda tur. Sondyqtan kámeletke tolmaǵandar jónindegi keshendi is-sharalar jospary qaıta qaralyp, bekitilsin. Mektep oqýshylarynyń jazǵy demalysyn tıimdi ótkizý baǵytynda jumystar júrgizilsin» degen ol sala basshylaryna birqatar mindetter júktedi.
Endi óńirde BAQ pen ınternet-keńistikte zorlyq-zombylyq pen qatygezdikke qarsy aqparattyq naýqan ótkizilip, qala, aýdandardaǵy balalardy tasymaldaıtyn kólikterdiń qaýipsiz-tehnıkalyq erekshelikterine taldaý júrgiziledi. Sonymen qatar, saýyqtyrý lagerleriniń, aýla klýbtarynyń, ózge de mektepten tys mekemelerdiń jelisin arttyrý, úıirmelerge qatysýshylardyń sanyn kóbeıtý baǵytynda jumys kúsheımek. Oıyn alańdary men attraktsıondaryna monıtorıng jasalady. Sondaı-aq balalardy júzýge úıretýge jáne basseınderdi kóbeıtýge serpin beretin «Qaýipsiz sý» jazǵy aktsııasyn ótkizý josparlanyp otyr.
