Túrkistan oblysynda birneshe jyldan beri izdeýde júrgen eki qylmysker ustaldy
TÚRKІSTAN. QazAqparat -Túrkistan oblysy PD Krımınaldyq polıtsııa qyzmetkerleri buryn aýyr qylmys jasaǵany úshin izdestirilgen eki qylmyskerdi qolǵa túsirdi, dep habarlaıdy QazAqparat óńirlik Polıtsııa departamentiniń baspasóz qyzmetine silteme jasap.
Túrkistan oblysy PD bastyǵynyń orynbasary polıtsııa podpolkovnıgi Qurmanbek Sahovtyń aıtýynsha, Kentaý qalasynyń PB-ne aýrýhanadan pyshaq jaraqatymen jas jigittiń jetkizilgeni jóninde habarlama kelip túsken. Tekserý barysynda jábirlenýshi Kentaý qalasyndaǵy kafelerdiń birinde jaraqat alǵany anyqtaldy. Osy jaıt boıynsha 2005 jyly QR QK 106-baby 2-bólimine sáıkes qylmystyq is qozǵalyp, kúdiktige izdeý jarııalandy. Ol sol aralyqtarda boı tasalap, qashyp júrgen.
«Osy jyldar boıy polıtsııa qyzmetkerleri jedel-izdestirý sharalaryn toqtatqan joq. Olar tanystar sheńberin jáne jasyrynǵan qylmysker turatyn mekenjaıdy anyqtady. 15 jyldan keıin polıtsııa qyzmetkerleri izdestirilip jatqan er adamnyń izine shyǵyp, ony Túrkistan oblysynyń bir eldi mekeninen ustady.
Sondaı-aq 2015 jyly Túrkistan qalasynyń PB-ne jas áıeldiń zorlanǵany jóninde aryz kelip túsken. Osy oqıǵa boıynsha polıtsııada QR QK-niń 120-baby boıynsha qylmystyq is qozǵaldy. Alaıda, qylmysker qylmystyq qýdalaýdan jasyrynyp úlgergen. Bes jyl boıy 35 jastaǵy er adamdy izdestirý isi júrgizildi. 2020 jyly mamyr aıynyń ortasynda Túrkistandyq jedel ýákilder Kentaý qalasynyń mańyndaǵy saıajaı alqabynda kúdiktini ustady. Tergeý barysynda polıtseıler onyń osy ýaqyt aralyǵynda Pavlodar oblysynda jasyrynǵanyn anyqtady. Ol jaqta da osyǵan uqsas qylmys jasap, oqýshy qyzdy jábirlep, týǵan ólkesine qaıta oralǵan. Zorlyqshy tergeý ızolıatorynda jáne jaqyn arada Pavlodar oblysyna etappen aparylady. Onda oǵan qatysty bizdiń áriptesterimiz sotqa deıingi tergeý
amaldaryn júrgizip, kámeletke tolmaǵandarǵa qatysty zorlyq-zombylyq jasaý jaıty boıynsha isti sotqa jiberedi», deıdi Qurmanbek Sahov.
Atap óter bolsaq, jyl basynan beri Túrkistan oblysy PD polıtseıleri 52 qylmyskerdi qolǵa túsirdi, olardyń 10-y aýyr jáne asa aýyr qylmystary úshin izdestirilýde júrgender.
