Túrkistan oblysynda birqatar kásipkerlik nysandarynyń jumys isteýine ruqsat berildi
TÚRKІSTAN. QazAqparat - Túrkistan oblysynda birqatar kásipkerlik nysandarynyń jumys isteýine ruqsat berildi, dep habarlaıdy QazAqparat óńirlik kommýnıkatsııalar qyzmetine silteme jasap.
Túrkistan oblysynyń Bas memlekettik sanıtarııalyq dárigeriniń qaýlysyna sáıkes týrızm obektileri men uıymdarǵa, onyń ishinde qonaq úıler, sanatorıı, otel, demalys úıleri, týrıstik bazalar sııaqty nysandardyń jumys isteýine 24 tamyz kúninen bastap ruqsat berildi. Biraq, atalǵan qyzmet kórsetý oryndarynyń jumys isteý qýaty 80 paıyzdan aspaýy kerek. Sondaı-aq, áleýmettik qashyqtyqty saqtaı otyryp, 3 adamnan aspaıtyn toptarmen nemese bir otbasy múshelerimen oıyn-saýyq obektilerinsiz saıabaqtarǵa, alańdar men skverlerge, jaǵalaýlarǵa jáne halyqtyń ózge de demalys oryndaryna barýǵa bolady. Alaıda, mundaı jerlerde azamattar únemi maska kııý rejımin jáne 2 metrden kem emes áleýmettik araqashyqtyqty saqtaýy mindetteledi.
Odan bólek, sán salondarynyń, shashtarazdyń jumys isteýine ruqsat etilip otyr. Alaıda, azamattar qyzmet alý úshin aldyn ala jazylýy kerek. Mundaı nysandar jumys kúnderi ǵana saǵat 10.00-den 18.00-ge deıin qyzmet kórsetedi. Osyndaı rejımmen basseınsiz fıtnes-ortalyqtar men sporttyq-saýyqtyrý ortalyqtary da jumys isteıtin bolady.
Qaýlyǵa sáıkes qoǵamdyq kólik qozǵalysy jumys kúnderi saǵat 06:00-den 21:00-ge deıin shektelip, qoǵamdyq kólik jumysy demalys kúnderi toqtatylady. Qoǵamdyq kólikte jolaýshylarǵa betperde kııý mindetteledi. Al, qalaaralyq, aýdanaralyq jolaýshylar tasymaldaıtyn qoǵamdyq kólik jumys istemeıdi.
Sonymen qatar, kınoteatrlardyń, túngi klýbtardyń, saýda-oıyn-saýyq keshenderiniń janyndaǵy balalar oıyn alańdarynyń, kompıýter klýbynyń, karaoke, bılıard, boýlıng ortalyqtarynyń, fýdkorttardyń, banket zaldarynyń, býkmekerlik keńselerdiń, jabyq úı-jaılardaǵy balalar oıyn alańdary men attraktsıondardyń, batýttardyń, sport zaldarynyń, basseınderdiń, qalalyq, qoǵamdyq jaǵajaılardyń, akvaparkterdiń qyzmeti shekteldi.
Al, qoǵamdyq tamaqtandyrý obektileri kúsheıtilgen sanıtarlyq-dezınfektsııalyq rejımdi saqtaı otyryp 30 orynǵa deıin ujymdyq is-sharalarsyz, keminde 2 metr áleýmettik qashyqtyqty saqtaı otyryp, jumys isteıdi. Mundaı oryndar tek jumys kúnderi ǵana saǵat 10.00-den 21.00-ge deıin.
Jalpy basqa da kásiporyndarynyń basshylaryna jáne jeke kásipkerlerge karantın aıaqtalǵanǵa deıin maska, qolǵap kııý jáne antıseptık paıdalaný jónindegi talaptardy qatań saqtaýǵa mindetti. Halyqqa qyzmet kórsetetin obektiler qyzmetkerlerin ýaqtyly aýystyrylatyn bir ret qoldanylatyn qolǵappen jáne temperatýrany ólsheýge arnalǵan aspaptarmen qosymsha qamtamasyz etilý shart.
