Túrkistan oblysynda birinshi kún elektr stansasy salynady
NUR-SULTAN. QazAqparat - Qazaqstanda kún elektr stansasyn salý boıynsha birinshi jobalyq aýktsıon ótkiziledi. Bul týraly búgin Úkimet otyrysynda QR Energetıka mınıstri Qanat Bozymbaev aıtty, dep habarlaıdy QazAqparat tilshisi.
Onyń aıtýynsha, ótken jyldan bastap «jasyl energetıka» salasynda jobalardy irikteý aýktsıondyq tetik boıynsha ótkiziledi. Bul sońǵy tutynýshylardyń tarıfterine jańartylatyn energııa kózderiniń áserin birtindep tómendetýge múmkindik beredi. 2018-2019 jyldardaǵy halyqaralyq aýktsıondyq saýda-sattyqtar elektrondyq formatta ótkizildi. Onda jıyntyq qýaty 1 205 MVttyq jobalar qaraldy.
«Saýda-sattyqqa 12 elden 138 kompanııa qatysty. Qatysýshylar belgilengen qýaty shamamen 3 900 MVt jobalardy iske asyrýǵa ótinim bergen. Bul suranystan 3,2 esege artyq boldy. Aýktsıondyq saýda-sattyq qorytyndysy boıynsha, 42 kompanııa jeńimpaz atandy. Olarmen 967 MVt quraıtyn kelisimsharttarǵa qol qoıylýda», - dedi ol.
Buǵan qosa, Q.Bozymbaevtyń dereginshe, aýktsıonǵa qatysýshylardyń ótinimderi boıynsha elektr energııasyna tarıfter tómendetildi. Atap aıtqanda, jel elektr stansalary boıynsha 11, shaǵyn sý elektr stansalary boıynsha 15, kún elektr stansalary boıynsha 36 paıyzǵa azaıdy. Bul rette, jekelegen jobalar boıynsha kún stansalary úshin 51 paıyzǵa, jel men sý elektr stansalary úshin 23 paıyzǵa tómendedi.
«Osy jyldyń 27 qarashasynda mınıstrlik kún elektr stansasyn salý boıynsha birinshi jobalyq aýktsıondy ótkizýdi josparlaıdy. Onyń belgilengen qýaty 50 MVt bolady. Bul stansaǵa Túrkistan oblysy Sháýildir kentiniń janynan alań bólingen. Qazirdiń ózinde halyqaralyq kompanııalar osy aýktsıonǵa qyzyǵýshylyq tanytýda. Kelesi jyldary Energetıka mınıstrligi kún jáne jel stansalary boıynsha osyndaı jobalyq aýktsıon ótkizýdi josparlap otyr», - dedi mınıstr.
