Túrkistan oblysynda bir jylda 235 mlrd teńge salyq óndirilgen

TÚRKІSTAN. QazAqparat – Túrkistan oblysynda ótken jyly 235 mlrd 744 mln teńge salyq óndirilip, memlekettik kiris organdary qyzmetin baǵalaý tıimdiliginiń kórsetkishi boıynsha elimizde úzdik nátıjege qol jetkizgen. Bul týraly Túrkistan oblysy boıynsha memlekettik kirister departamentiniń basshysy Dýlat Nurmoldın málimdedi, dep habarlaıdy QazAqparat tilshisi.

Dýlat Nurmoldınniń aıtýynsha, óńirde memlekettik bıýdjet jospary 102,4% oryndalǵan.

«Pandemııaǵa baılanysty bıýdjettiń kirisine tólenýi tıis 8 mlrd 771,8 mln teńge somadan salyq tóleýshiler bosatyldy. 2020-2022 jyldarǵa mıkro jáne shaǵyn bıznes sýbektileri – 4 mlrd 877,1 mln teńge, dara kásipkerler – 8 mlrd 948 mln teńge jáne áleýmettik salyq – 3 mlrd 208,2 mln teńge túsimder boıynsha salyqtan bosatylǵan. Atalǵan salyqtardyń ornyn toltyrý maqsatynda jáne memlekettik bıýdjettiń kiris jaǵyn ulǵaıtý baǵytynda departament tarapynan salyqtyq jáne kedendik ákimshilendirý jumystaryn júrgizý nátıjesinde qosymsha kiris kózderinen 40 mlrd 675 mln teńge anyqtalyp, óndirilgen», - dedi Dýlat Nurahmetuly.

Sonymen qatar, Salyq kodeksine sáıkes, 42 307 kólik salyǵynan jáne 50 472 salyq tóleýshi múlik salyǵynan bosatylǵan.

59 239 salyq tóleýshi jer salyǵynan bosatylǵan. Aǵymdaǵy jyly departamentke respýblıkalyq 1414 «Biryńǵaı Baılanys ortalyǵynyń» fýnktsııasy berilip, salyq tóleýshilerdiń ótinishteri qabyldanýda.

Al, ótken jyldyń tamyz-jeltoqsan aılarynda departamenttiń 1414 jelisine oblys turǵyndarynan 9 068 saýal túsip, qanaǵattandyrylǵan.