Túrkistan oblysynda bir úıir jylqyny urlaǵan barymtashylar ustaldy
TÚRKІSTAN. QazAqparat - Sozaq aýdany PB kezekshi bólimine jergilikti turǵyn aryzdanǵan. Jábirlenýshi er azamattyń aıtýynsha jaıylymdyq alqapta júrgen 7 bas jylqysyn túngi ýaqytta belgisiz bireýler urlap ketken, dep habarlaıdy QazAqparat Túrkistan oblystyq PD baspasóz qyzmetine silteme jasap.
Keltirilgen jalpy shyǵyn kólemi 3 000 000 teńgege jýyq.
Atalǵan derek QK 188-1-baby, ıaǵnı «Mal urlyǵy» qylmystyq quqyq buzýshylyǵy boıynsha tirkeldi.
Aqparat alysymen Sozaq aýdany PB-nyń tájirıbeli qyzmetkerlerinen jedel-tergeý toby qurylyp, oqıǵa ornyna jetti. Tártip saqshylary jaqyn mańdaǵy barlyq aýmaqtar men jaıylymdardy aralap, kýálerden jaýap aldy.
Jedel-izdestirý is-sharalarynyń nátıjesinde polıtsııa qyzmetkerleri mal urlyǵyn jasaǵandardyń izine shyǵyp, úsh kúdikti er azamatty ustady. Olardyń barlyǵy Báıdibek aýdanynyń turǵyndary bolyp shyqty. Qazirgi tańda kúdiktiler qamaýǵa alynyp, tergeý amaldary júrgizilýde.
Belgili bolǵandaı, olar ońaı jolmen aqsha tabýdy kózdep,
ózara sóz baılasqan. Sodan soń túngi saǵat 04:00 shamasynda jaıylymda júrgen 7 jylqyny Báıdibek aýdanyndaǵy kúdiktiniń biriniń qorasyna aıdap barǵan.
Tań atysymen jylqylardy Báıdibektik turǵynnyń birine satyp jibergen. Al aqshasyn bólisip, bas paıdalarynyń qajettiligine jumsaǵan.
