Túrkistan oblysynda bir táýlikte 2,5 myńǵa jýyq adam koronavırýsqa test tapsyrdy
TÚRKІSTAN. QazAqparat – Sońǵy apta ishinde Túrkistan oblysynda koronavırýs juqtyrǵandar sany ósken. Bul týraly oblystyq qoǵamdyq densaýlyq basqarmasynyń basshysy Marat Pashımov aıtty, dep habarlaıdy QazAqparat tilshisi.
Basqarma basshysynyń aıtýynsha, búginde óńirdegi ınfektsııalyq statsıonarlarda 6 naýqas Covid-19 ınfektsııasynan jáne 28 adam vırýsty pnevmanııadan em qabyldaýda. Zerthanalarda ótken táýlikte 2 233 adam koronavırýstyq ınfektsııaǵa synama tapsyrǵan.
«Ekeýinen oń nátıje shyqty. Búgingi tańǵa oblysta test qaldyǵy 76 763-ti quraıdy. Jalpy, Túrkistan oblysynda pandemııa bastalǵaly beri COVID-19 indetin juqtyrǵan 3 461 naýqas tirkelgen. Jazylyp shyqqandar sany 3 378. Іndettiń yqtımal ekinshi tolqynyna daıyndyq maqsatynda óńirde medıtsınalyq uıymdardyń materıaldyq-tehnıkalyq bazasy úzdiksiz jabdyqtalýda»,-dedi Marat Pashımov.
Oblysta taǵy 8 aýrýhanada qosymsha ottegi stantsııalary ornatylǵan. Sondaı-aq, 80 birlik oksıgenatsııa apparaty (HI-FLOW) satyp alyndy. Budan bólek, ottegi kontsentratorlarynyń sany 900-ge jetkizilip, ottegi núkteleriniń sany 2 095 núktege deıin arttyrylǵan. Barlyq emdeý mekemelerinde 2-3 aılyq dári-dármek qory daıyn. Jedel-járdem qyzmetine 122 avtokólik qamtamasyz etý josparlanyp, búgingi kúnge 77 avtokólik jetkizildi.
